اے ستم گر بے وفا یہ بے وفائی کب تلک

اے ستم گر بے وفا یہ بے وفائی کب تلک

عاشقوں کی تیرے کوچے میں دہائی کب تلک

بے دلوں سے دل ربا یا پر جفائی کب تلک

سیدھی باتوں میں بھی تیری کج ادائی کب تلک

ہم تو تجھ پر ہو رہے ہیں جان اور دل سے فدا

دوسروں کو دیکھ کر یہ دل ربائی کب تلک

اے کماں ابرو نہ ہر دم مار تو تیر نگاہ

زلف خم خنجر سے تیری خوش نمائی کب تلک

ہم تیرے بیمار ہیں اور تو ہمارا ہے حکیم

جلد مل ہووے شفا درد و دوائی کب تلک

اشک خونی رو رہا ہوں تیری فرقت میں ہمیش

دور سے دکھلاؤ گے دست حنائی کب تلک

کھو دیا سب نام و ننگ اے با حیا تیرے لئے

ہم کریں گے اس جہاں میں بے حیائی کب تلک

عارفاؔ ہم دوستی سے کرتے ہیں عجز و نیاز

پھر بتا اے ناز پرور یہ لڑائی کب تلک