معدوم ہوئے جاتے ہیں اب تاب و تواں اور

معدوم ہوئے جاتے ہیں اب تاب و تواں اور

کچھ گل نہ کھلائے کہیں یہ درد نہاں اور

گھل گھل کے ترے غم میں ہوا جی کا زیاں اور

جب تو ہی نہ پوچھے تو بھلا جاؤں کہاں اور

ہے دل کی زباں اور دہن کی ہے زباں اور

پھر تو ہی بتا کیوں نہ بڑھے میرا گماں اور

یوں تو ہیں زمانے میں بہت مجھ سے جواں اور

جو شان تجمل ہے تری ہے وہ کہاں اور

اے صبر تجھے صبر پڑے میری فغاں کا

کچھ روز تو رہنے دے مجھے محو فغاں اور

دل گردش ایام سے پس پس کے ہوا خاک

اب خاک اڑاتے ہو اڑاؤ میری جاں اور

شاکر ہے ترا بزم میں گھر پر ترا شاکی

ہے فطرت دل خوب وہاں اور یہاں اور

ہم جنت واعظ کی حقیقت سے ہوں منکر

مل جائے اگر تیرے محلے میں مکاں اور

اس دور ضعیفی میں اثرؔ لاج بچانا

یہ اور زمانہ ہے یہ دن اور سماں اور