فرشتوں کی جہاں پر انتہا ہے

فرشتوں کی جہاں پر انتہا ہے

وہاں سے تو ہماری ابتدا ہے

وفا کیا چیز ہے، اس کو پتا ہے

وفا کے نام پر جو مٹ گیا ہے

زمانے کی عجب الٹی ہوا ہے

بڑھاپے میں جوانی کی ادا ہے

چمن برباد ہوتا جا رہا ہے

کہ جب سے اس میں الو آگیا ہے

کسی سے دوستی کرنا سمجھ کر

لباسِ دوست میں دشمن چھپا ہے

چمن کو جب پڑی خوں کی ضرورت

تو پہلے ہم نے اپنا خوں دیا ہے

چمن کی آبرو ہے میرے دم سے

مجھی کو کہہ رہے ہو، بے وفا ہے

چمن میں پھر کوئی آئے گی آفت

مزاجِ وقت پھر بدلا ہوا ہے