تمہاری فکروں سے ہوتا کیا ہے جو منشا حق کا ہے پورا ہوگا

تمہاری فکروں سے ہوتا کیا ہے جو منشا حق کا ہے پورا ہوگا

خدا جو چاہے گا وہ کرے گا جو منشا حق کا ہے پورا ہوگا

ہزار تدبیریں کرکے دیکھو جولاکھ کوشش کرو گے پھر بھی

لکھا مقدر کا کب ٹلے گا جو منشا حق کا ہے پورا ہوگا

ہےفکر بے سود سب تمہاری، ہے سوچنا بھی عبث تمہارا

ہیں رنج وغم سب تمہارے بے جا، جو منشا حق کا ہے پورا ہوگا

ارادے پورے تمہارے گرہوں، تو قدرت حق کی کیا ضرورت

جو ہونا ہے وہ ہو رہے گا جو منشا حق کا ہے پورا ہوگا

جو تم ہو فانی تو آرزو کیا کہ وہ بھی اک دن فنا ہی ہوگی

خدا ہے باقی وہی رہے گا جو منشا حق کا ہے پورا ہوگا

ارادہ اس کا ہے سب پہ غالب کرے گا جو چاہے وہ ہے مالک

تمہارا پورا نہ ہوگا منشا جو منشا حق کا ہے پورا ہوگا

تم اپنی سب حسرتیں مٹا کر تمنا اس کی ہی دل میں رکھو

تو نا امیدی کا غم نہ ہوگا، جو منشا حق کا ہے پورا ہوگا

سپرد کردو امور اپنے، خدا سے بہتر نہیں ہے کوئی

تمہیں وہ خود ہی سنوار دے گا، جو منشا حق کا ہے پورا ہوگا

نہیں ہے دارین میں بھی کوئی بجز خدا کے مدد کرے جو

اسی سے تم اپنی لو لگانا جو منشا حق کا ہے پورا ہوگا

تمہاری قدرت میں ہے دھرا کیا کرو گے جو چاہے تم بھلا کیا

جو ہوگا قادر وہی کرے گا، جو منشا حق کا ہے پورا ہوگا