کھنچی ہے شمشیر ناز قاتل چلے ہیں مشتاق مرگ گھر سے

کھنچی ہے شمشیر ناز قاتل چلے ہیں مشتاق مرگ گھر سے

کفن لپیٹے ہوئے کمر سے کوئی ادھر سے کوئی ادھر سے

وہ گل بدن جاں ہے چمن کی یہ جانتا ہوں میں پیشتر سے

ہنسا تو کلیاں چٹک کے نکلیں کیا تکلم تو پھول برسے

دکھائیے آج روئے زیبا اٹھائیے درمیاں سے پردہ

کہاں سے اب انتظار فردا یہی تو سنتے ہیں عمر بھر سے

جفائے معشوق کا گلہ کیا صعوبت دشت کربلا کیا

قدم بھی ہٹتے ہیں عاشقوں کے اگر برستی ہے آگ برسے

دکھاؤں اشکوں کی گر روانی گھٹا ہو غیرت سے پانی پانی

ابھی کھلے حال لن ترانی ہٹاؤں دامن جو چشم تر سے

نہ بے قراری کا ڈھنگ آیا نہ اشک پر خوں کا رنگ آیا

چمک کے بجلی ہزار تڑپی گرج کے بادل ہزار برسے

ادھر سے چلمن ہٹا کے جھانکا ادھر سے پردہ ہٹا کے دیکھا

لگایا ظالم نے تیر ہم پر کبھی ادھر سے کبھی ادھر سے