وہ پہلے غم دیا کرتے ہیں پھر مسرور کرتے ہیں

وہ پہلے غم دیا کرتے ہیں پھر مسرور کرتے ہیں

تسلی ہم تری اے خاطر رنجور کرتے ہیں

نہیں ہوتا نہیں ہوتا کسی عنوان غم ہلکا

بہت تدبیر تسکین دل رنجور کرتے ہیں

عجب سرکار ہے ان کی ستم ہی میں کرم دیکھا

وہی مقبول ہوتا ہے جسے مقہور کرتے ہیں

مزا آتا ہے ان کو چھیڑنے میں اپنے عاشق کے

کبھی مغموم کرتے ہیں کبھی مسرور کرتے ہیں

کسی کے ناز اٹھائیں یہ تو ہم سے ہو نہیں سکتا

مگر منظور ہے وہ کام جو مزدور کرتے ہیں

ادا سے دیکھ لیتے ہیں میں جب جانے کو کہتا ہوں

پھر اس پر کہتے ہیں ہم کب تمہیں مجبور کرتے ہیں

وہ یاد آ آ کے تڑپاتے ہیں برسوں ہائے پھر کیا کیا

جو دم بھر کے لیے آکر کبھی مسرور کرتے ہیں