کہتا ہوا پھرتا ہے محشر میں یہ دیوانہ

کہتا ہوا پھرتا ہے محشر میں یہ دیوانہ

یا رب مرا ویرانہ یا رب مرا ویرانہ

جی میں ہے چڑھا جاؤں مے خانہ کا مے خانہ

ہاں ساقیٔ دریا دل پیمانے پہ پیمانہ

دکھلا دے کشش اتنی اے جلوۂ جانانہ

گلشن میں رہے بلبل محفل میں نہ پروانہ

عاشق تو ہے اے زاہد ہر وقت عبادت میں

اشکوں کا تسلسل ہے اک سبحۂ صد دانہ

آنکھیں مری ہوتی ہیں اب بند ہمیشہ کو

ہاں ایک جھلک اب تو اے جلوۂ جانانہ

اتنی تو پلا ساقی اب اس سے بھی کیا کم ہو

لبریز تو ہو جائے یہ عمر کا مے خانہ

ساقی نے بدل ڈالی دنیا مری ہستی کی

آنکھیں ہیں کہ مے خانے دل ہے کہ پری خانہ

دیوانہ بنے ان کا یہ ظرف نہ یہ ہمت

مجذوبؔ تو ہے ان کے دیوانوں کا دیوانہ