کتاب زندگی کے سرخ افسانے بھی بدلیں گے

کتاب زندگی کے سرخ افسانے بھی بدلیں گے

بہاریں پھول برسائیں گی ویرانے بھی بدلیں گے

کبھی تو فیصلہ ہوگا من و تو کے مباحث کا

حرم والے تو بدلے ہیں صنم خانے بھی بدلیں گے

ابھی تو چاک داماں ہیں چنیں گے ایک دن تنکے

جنوں حد سے گزرنے دو یہ دیوانے بھی بدلیں گے

قرائن کہہ رہے ہیں انقلاب اک اور آئے گا

شکستہ جھونپڑے بدلے ہیں کاشانے بھی بدلیں گے

دکھائے جائیں ٹھنڈی گرمیاں دولت کے متوالے

لگی تو جب بجھے گی جب یہ خس خانے بھی بدلیں گے

مجھے شکوہ نہیں ساقی تری اس کم نگاہی کا

اگر مے خوار بدلے ہیں تو میخانے بھی بدلیں گے

نہیں معلوم شمع انجمن کا حشر کیا ہوگا

روش اپنی اگر محفل میں پروانے بھی بدلیں گے

سمجھتے ہیں ہمارا خون اسلمؔ رنگ لائے گا

اگر عنوان بدلے ہیں تو افسانے بھی بدلیں گے