جس کے تم دلبر ہو جس دل میں تمہاری یاد ہو

جس کے تم دلبر ہو جس دل میں تمہاری یاد ہو

وہ ہمیشہ خاک چھانے وہ سدا برباد ہو

کر کے زخمی چل دیا وہ میں یہ کہتا رہ گیا

اور بھی اک وار مجھ پر او ستم ایجاد ہو

مصحف رخسار جاناں حفظ کرنا چاہیے

حافظ قرآں وہی ہے جس کو قرآں یاد ہو

سیر کر دے اب کہ گلشن بیں ہے ہنگام بہار

ہم اسیروں کی رہائی اب تو اے صیاد ہو

رہزن ایمان تو جلوہ دکھا جائے اگر

بت پجیں مندر میں مسجد میں خدا کی یاد ہو

حور کا دل چھینتے ہو جن کی تم لیتے ہو جاں

پر کترتے ہو پری کے اور آدم زاد ہو

پڑھتے رہتے ہیں تمہارا ہی سبق یہ اور تم

عاشقوں کو بھول جاتے ہو بڑے استاد ہو

ہم کریں مشق محبت تم کرو مشق ستم

حرف جس کے خوب صورت ہوں اسی پر صاد ہو

قتل ہونے پر میں راضی ہوں مگر یہ شرط ہے

تیرے ہاتھوں سے گلے پر خنجر فولاد ہو

جو تمہاری بات ہے ہے وہ زمانہ سے جدا

شوخیاں ایجاد کرتے ہو بڑے استاد ہو

کھینچ کر تلوار اکبرؔ پر چلے ہو بے دریغ

بے گنہ کو قتل کرتے ہو بڑے جلاد ہو