نہ ہے آغاز سے مطلب نہ ہے انجام سے کام

نہ ہے آغاز سے مطلب نہ ہے انجام سے کام

نہ غرض صبح سے مجھ کو نہ مجھے شام سے کام

شورش درد ہی کافی ہے مری تسکین کو

نہ دل آزار سے مطلب نہ دل آرام سے کام

رشتۂ زندگی کس طور سے مقطوع نہ ہو

مجھے رہتا ہے ہمیشہ تری صمصام سے کام

کس سے دل جاکے گرفتاری کو اپنی کہیے

نہ قفس سے کوئی واقف نہ رکھے دام سے کام

وصف اوروں کا بھلا کیوں کے میاں دل کو لگے

جس کو رہتا ہو صدا تیری ہی دشنام سے کام

عشقؔ پیزار سے اس کی جیے یا کوئی مرے

یار معشوق کو ہے اپنے ہی اب کام سے کام