درد الم بیتابیٔ و حسرت سر پہ بلا ہے کیا کیا کچھ

درد الم بیتابیٔ و حسرت سر پہ بلا ہے کیا کیا کچھ

مرنے پر بھی ہم نہیں تنہا ساتھ چلا ہے کیا کیا کچھ

سیل سرشک و طائر سدرہ باد صبا و ہد ہد دل

ہجر میں ہم نے قاصد کا سامان کیا ہے کیا کیا کچھ

نقد وحشت سکۂ داغ و گوہر اشک و خلعت درد

سرکار جنوں سے دل کو مرے انعام ملا ہے کیا کیا کچھ

مجھ سے ملیں جی کھول کے وہ ممکن ہی نہیں یہ حشر تلک

اغیار نے ان کے کان میں آکر پھونک دیا ہے کیا کیا کچھ

خاک اڑائی کوچہ بہ کوچہ ہو گئے رسوا دنیا میں

دیکھیے نیرؔ آئندہ قسمت کا لکھا ہے کیا کیا کچھ