رکھوں کس بنا پر آشیاں کی نگاہ شرر کا بھروسہ نہیں ہے

رکھوں کس بنا پر آشیاں کی نگاہ شرر کا بھروسہ نہیں ہے

بنے کیوں نہ آوارگی اس کی قسمت جسے اپنے گھر کا بھروسہ نہیں ہے

کبھی ملتفت ہے کسی وقت برہم مجھے اس نظر کا بھروسہ نہیں ہے

یہ دور قیامت نہیں ہے تو کیا ہے بشر کو بشر کا بھروسہ نہیں ہے

سر بزم افشا نہ ہو راز الفت نہیں چشم تر کا بھروسہ نہیں ہے

دل معتبر میں غم مختصر ہے دل معتبر کا بھروسہ نہیں ہے

یہ معیار حسن عقیدت تو دیکھو یقیں در یقیں پر جیے جا رہا ہو

دعاوں پہ ہے اعتماد مکمل یہ مانا اثر کا بھروسہ نہیں ہے

ہوئی رائیگاں سعیٔ پیہم نہ پوچھو میری حسرتوں کا جنازہ اٹھا ہے

وہاں لے کے آئی تمنائے منزل جہاں رہ گزر کا بھروسہ نہیں ہے

لیے تو چلا ہے مجھے ساتھ اپنے بصد اشتیاق و خلوص و محبت

نہ جانے کہاں چھوڑ دے ساتھ میرا مجھے راہبر کا بھروسہ نہیں ہے

نہ رسوا ہو ذوق نماز محبت ہے ڈر رائیگاں ہو نہ الفت کے سجدے

ترا اور یقیناً تیرا در رہے گا مجھے اپنے سر سر بھروسا بھروسہ نہیں ہے

ہر ایک سانس پر ہے گماں آخری ہے نہ پوچھو عجب عالم جانکنی ہے

بتاؤں میں کیا حال بیمار الفت سمجھ لو سہر کا بھروسہ نہیں ہے

میں فن کار ہوں شاعری میرا فن ہے مرکز توجہ کا دل کی لگن ہے

فدائی ہوں علم و ہنر کا اے قیصرؔ مجھے سیم و زر کا بھروسہ نہیں ہے