پیتے ہی سرخ آنکھیں ہیں مستِ شراب کی

پیتے ہی سرخ آنکھیں ہیں مستِ شراب کی

گرمی تو دیکھو ڈوبے ہوئے آفتاب کی

یہ کہئے طور جل گئے قسمت سے اے کلیم

تصدیق ہوگئی نگہ کامیاب کی

کیا کم تھا حسنِ باغ ہی اے باغبانِ حسن

اک شاخ تو نے اور لگا دی شباب کی

محشر کا دن ہے رخ سے نہ الٹو نقاب کو

دنیا نہ تاب لائے گی دو آفتاب کو

موسیٰ کو اپنے سر پہ چڑھایا بھی تھا بہت

جلوے نے خوب طور کی مٹی خراب کی

موجِ ستم سے دل کی تباہی محال ہے

طوفاں میں ڈوبتی نہیں کشتی شباب کی

جب سے گئے ہیں دیکھ کے تارے وہ اے قمرؔ

صورت بدل گئی ہے شبِ ماہتاب کی