خالی ہی سہی ساغر خاموش رہو سمجھو

خالی ہی سہی ساغر خاموش رہو سمجھو

مجبوریِ ساقی بھی اے تشنہ لبو سمجھو

سمجھیں نہ سمجھ والے سمجھاتا ہے جانے کیا

دیوانہ تمہارا ہے اب تم ہی چلو سمجھو

میں راہِ محبت کا اک ادنیٰ مسافر ہوں

رستہ نہ مرا روکو جانے دو ہٹو سمجھو

دل اپنا نہ کھو دینا کہنے پہ کبھی دل کے

یہ عشقِ مجازی ہے آنکھوں کو پڑھو سمجھو

غوطہ نہ لگاؤ تم نفرت کے سمندر میں

دریائے محبت کے تیراک بنو سمجھو

تا حشر ظفر یابی تقدیر تمہاری ہے

اللہ کا وعدہ ہے ایماں پہ رہو سمجھو

قدموں کے تلے ماں کے جنت ہے حکیمیؔ پر

ہے باپ مگر کنجی یہ یاد رکھو سمجھو