صرف غم ہم نے نوجوانی کی

صرف غم ہم نے نوجوانی کی

واہ کیا خوب زندگانی کی

اپنی بیتی اگر میں تجھ سے کہوں

بات نبڑے نہ اس کہانی کی

تیرے داغوں کی اے غم الفت

خوب ہم نے بھی باغبانی کی

جوں نگۂ دل گیا ہے آنکھوں کی راه

گرچہ ہم نے نگاہبانی کی

کس کے ہاں تم کرم نہیں کرتے

کبھو ادھر نہ مہربانی کی

اپنے نزدیک درد دل میں کہا

تیرے نزدیک قصہ خوانی کی

ہرزہ گوئی سے مجھ کو دی ہے نجات

ہے گی منت یہ بے زبانی کی

نہیں طاقت کہ دم نکال سکوں

اب یہ نوبت ہے ناتوانی کی

اثرؔ اس حال پہ بھی جیتا ہے

کیا کہوں اس کی سخت جانی کی