اپنا لاشہ آپ ہی ڈھونا پڑتا ہے

اپنا لاشہ آپ ہی ڈھونا پڑتا ہے

اپنے دکھ پہ آپ ہی رونا پڑتا ہے

دل کی کتھا کہنا سننا آسان نہیں

آہوں کو لفظوں میں پرونا پڑتا ہے

کیسا بندی خانہ ہے یہ دنیا بھی

آپ ہی ہنسنا آپ ہی رونا پڑتا ہے

رب کو عبادت گاہوں میں نہ ڈھونڈھ فقیہ

بندوں کو دامن میں سمونا پڑتا ہے

جنت ملے نہ لفظوں کی گردانوں سے

پہلے عمل کے بیج کو بونا پڑتا ہے

ایسے مراحل بھی آتے ہیں مانجھی کو

اپنا سفینہ آپ ڈبونا پڑتا ہے

راہ طلب میں منزل یوں کب ملتی ہے

پہلے اپنے آپ کو کھونا پڑتا ہے