ہوا جیسا نہ ہوتا یوں کلیم وطور کا عالم

ہوا جیسا نہ ہوتا یوں کلیم وطور کا عالم

اگر وہ دیکھ لیتے اس رخِ پرنور کا عالم

ترا روئے منور جیسا جلوہ روز روشن کا

تری زلف سیہ جیسے شبِ دیجور کا عالم

نگاہوں نے ہزاروں حسن کے پردے اٹھائے ہیں

مگر توبہ کسی کی نرگس مخمور کا عالم

فقط اس آسرے پر جان دے دی مرنے والے نے

کہ کاش آ کر کے تم بھی دیکھ لو مجبور کا عالم

وہاں ان کے تغافل کی نہیں ہے انتہا کوئی

یہاں دیکھا نہیں جاتا دلِ مہجور کا عالم

پہنچتی ہے نظر تو مہر وماہ وغنچہ وگل تک

نظر والوں نے دیکھا ہی نہیں ہے دور کا عالم

میں ثروت اس لیے بدمست سا ہر وقت رہتا ہوں

نظر میں جذب ہے اک نرگسِ مخمور کا عالم