میں بیت اللہ سے مسعودؔ تحفہ لے کے آیا ہوں

میں بیت اللہ سے مسعودؔ تحفہ لے کے آیا ہوں

غلاف کعبہ اقدسؔ کا ٹکڑا لے کے آیا ہوں

خدا کی راہ کا یثرب سے سودا لے کے آیا ہوں

حقیقت میں طریقت کا یہ تمغہ لے کے آیا ہوں

ہے اب پیش نگاہ شوق ہر دم شان رحمت کی

بتاؤں کیا کہ اس سرکار سے کیا لے کے آیا ہوں

سماتا ہی نہیں نظروں میں میری طور کا منظر

کسی کا دل کے آئینے میں جلوہ لے کے آیا ہوں

شرف حاصل ہوا دربار احمد میں رسائی کا

میں بیمار محبت تھا مداوا لے کے آیا ہوں

شفاعت کا بھروسہ نقد رحمت ہاتھ آیا ہے

مدینہ اور مکہ سے خزانہ لے کے آیا ہوں

جو مانگا حق سے وہ پایا رسول اللہ کے در سے

کہوں کیا حضرت واعظ میں کیا کیا لے کے آیا ہوں

گیا تھا سوئے کعبہ ساز آہنگ جنوں لے کر

مدینہ سے عجب پر کیف نغمہ لے کے آیا ہوں

نہایت سخت تھی مسعود عصیاں کی گراں باری

مگر حضرت سے بخشش کا سہارا لے کے آیا ہوں