نگاہوں میں بھری وہ شوخیاں ہیں

نگاہوں میں بھری وہ شوخیاں ہیں

تڑپتی ہر ادا میں بجلیاں ہیں

خبر آنے کی ان کے دے رہی ہیں

نزع میں آ رہی جو ہچکیاں ہیں

میرا ایمان لوٹے جا رہی ہیں

یہ کس کافر ادا کی شوخیاں ہیں

وہ اس انداز سے پردے سے نکلے

کہ چھائیں ہر طرف رعنائیاں ہیں

خدا رکھے سلامت دردِ الفت

بڑی راحت فزا تنہائیاں ہیں

میں اس انداز سے محشر میں آیا

میرے آگے میری رسوائیاں ہیں

تصور میں ہوئے وہ جلوہ افگن

نظر میں کوندتی پھر بجلیاں ہیں

امیرِؔ صابری پر پیارے اغیار

بہت آقا کرم فرمائیاں ہیں