choTi mein agar hai yar tawiz

choTī meñ agar hai yaar tā'vīz

lā mere hī sar se maar tā'vīz

yaañ hubb ke to pāñch chaar tā'vīz

vaañ buġhz ke haiñ hazār tā'vīz

hai mār-e-siyāh us kī choTī

man saañp kā zar-nigār tā'vīz

ghar un ke ga.e to ham ne gaaḌe

chāroñ konoñ meñ chaar tā'vīz

likhe mire ḳhuun se jo 'āmil

dikhlā.e na.ī bahār tā'vīz

jaatī nahīñ hijr kī tab-e-hār

nāhaq hai gale kā haar tā'vīz

qātil ne likhā jo koī purza

samjhā maiñ jigar-figār tā'vīz

chāndī huī us kī jab diyā hukm

sone meñ mañDhe sunār tā'vīz

ho ek sipar na teġh ġham kī

haikal meñ jo hoñ hazār tā'vīz

lo tār-e-nazar mirī agar hai

Dore kā ummīd-vār tā'vīz

kyuuñ rashk se dil jale na merā

ho us se jo ham-kanār tā'vīz

choTī ne tire jo sar chaḌhāyā

hai sāhib-e-iftiḳhār tā'vīz

bāzū-e-sanam kahāñ kahāñ tū

allāh re tirā vaqār tā'vīz

allāh re 'amīr' soz-e-furqat

jal jaatā hai barq-dār tā'vīz

choTi mein agar hai yar ta'wiz

la mere hi sar se mar ta'wiz

yan hubb ke to panch chaar ta'wiz

wan bughz ke hain hazar ta'wiz

hai mar-e-siyah us ki choTi

man sanp ka zar-nigar ta'wiz

ghar un ke gae to hum ne gaDe

chaaron konon mein chaar ta'wiz

likhe mere KHun se jo 'amil

dikhlae nai bahaar ta'wiz

jati nahin hijr ki tab-e-haar

nahaq hai gale ka haar ta'wiz

qatil ne likha jo koi purza

samjha main jigar-figar ta'wiz

chandi hui us ki jab diya hukm

sone mein manDhe sunar ta'wiz

ho ek sipar na tegh gham ki

haikal mein jo hon hazar ta'wiz

lo tar-e-nazar meri agar hai

Dore ka ummid-war ta'wiz

kyun rashk se dil jale na mera

ho us se jo ham-kanar ta'wiz

choTi ne tere jo sar chaDhaya

hai sahib-e-iftiKHar ta'wiz

bazu-e-sanam kahan kahan tu

allah re tera waqar ta'wiz

allah re 'amir' soz-e-furqat

jal jata hai barq-dar ta'wiz