چوٹی میں اگر ہے یار تعویذ

چوٹی میں اگر ہے یار تعویذ

لا میرے ہی سر سے مار تعویذ

یاں حب کے تو پانچ چار تعویذ

واں بغض کے ہیں ہزار تعویذ

ہے مار سیاہ اس کی چوٹی

من سانپ کا زرنگار تعویذ

گھر ان کے گئے تو ہم نے گاڑے

چاروں کونوں میں چار تعویذ

لکھے مرے خون سے جو عامل

دکھلائے نئی بہار تعویذ

جاتی نہیں ہجر کی تب حار

ناحق ہے گلے کا ہار تعویذ

قاتل نے لکھا جو کوئی پرزہ

سمجھا میں جگر فگار تعویذ

چاندی ہوئی اس کی جب دیا حکم

سونے میں منڈھے سنار تعویذ

ہو ایک سپر نہ تیغ غم کی

ہیکل میں جو ہوں ہزار تعویذ

لو تار نظر مری اگر ہے

ڈورے کا امیدوار تعویذ

کیوں رشک سے دل جلے نہ میرا

ہو اس سے جو ہمکنار تعویذ

چوٹی نے ترے جو سر چڑھایا

ہے صاحب افتخار تعویذ

بازوئے صنم کہاں کہاں تو

اللہ رے ترا وقار تعویذ

اللہ رے امیرؔ سوز فرقت

جل جاتا ہے برق دار تعویذ