یہی میرا مذہب یہی میرا ایماں میرا جسم غازی مری روح غازی

یہی میرا مذہب یہی میرا ایماں میرا جسم غازی مری روح غازی

تمہارے تصور کے صدقے میں آقا نظر بھی نمازی ہے دل بھی نمازی

خدا کی قسم کوئی دکھیا سوالی مدینہ سے آتا نہیں ہاتھ خالی

بڑے بندہ پرور ہیں یثرب کے والی بہت عام ہے ان کی بندہ نوازی

یہیں سے فقیروں کو ملتی ہے میری یہیں خواجگی ہے یہیں دستگیری

در مصطفیٰ پھر در مصطفیٰ ہے خدارا لگا دے مقدر کی بازی

کہوں کیا میں اپنے دکھے دل کی حالت نہ جینے کی مہلت نہ مرنے کی فرصت

یہی وقت ہے اے شفیع قیامت دکھا دیجیے شان مفلس نوازی

یہ سچ ہے کہ دنیا مخالف ہے انورؔ مگر میرے حامی ہیں محبوب داور

مجھے کیا ڈرائیں گے میرے مخالف کہ مرنے سے ڈرتا نہیں کوئی غازی