خاک سے تا بہ کہکشاں ہم نے تو جب کیا سفر

خاک سے تا بہ کہکشاں ہم نے تو جب کیا سفر

عشق ملا قدم قدم حسن ملا نظر نظر

اے دل بیقرار آ رو لیں تڑپ لیں جاگ لیں

نیند کی فکر کیا ابھی رات ملی ہے بے سحر

دل سے نکل کے ہر صدا کیوں نہ دلوں میں ڈوب جائے

ساز مرا لطیف ہے نغمہ ترا لطیف تر

کوچۂ دوست دیکھ کر اشک وفا ٹپک پڑے

چن لے کوئی جو چن سکے پھول پڑے ہیں خاک پر

صبح ازل سے میں چلا شام ابد تک آ گیا

عمر دراز شوق ہے میری حیات مختصر

وسعت کائنات کی سیر کا ماحصل تو ہے

تیرے ہی در پہ آئے گا کل یہ تھکا ہوا بشر

اپنے ہی دوست کی تو ہیں جتنی ہیں یہ نشانیاں

دیر ملے تو سر جھکا کعبہ ملے سلام کر

وعدۂ دوست کچھ نہیں ایک مسلسل آرزو

رات گزر گئی تو پھر رات کا انتظار کر

حسن بھی سوا ملی عشق سے دل کو روشنی

تم ہو چراغ انجمن میں ہوں چراغ رہگزر

چشم کرم گراں سہی چشم کرم نہ کیجیے

ایک نگاہ تو کبھی درشنؔ خستہ حال پر