نگاہ لطف کے امیدوار ہم بھی ہیں

نگاہ لطف کے امیدوار ہم بھی ہیں

لئے ہوئے یہ دل بیقرار ہم بھی ہیں

ہمارے دست تمنا کی لاج بھی رکھنا

ترے فقیروں میں اے شہر یار ہم بھی ہیں

ادھر کبھی تو سن اقدس کے دو قدم جلوے

تمہاری راہ میں مشت غبار ہم بھی ہیں

جو سر پہ رکھنے کو مل جائے نعل پاک رسول

تو پھر کہیں گے کہ ہاں تاجدار ہم بھی ہیں

یہ کس شہنشہ والا کا صدقہ بٹتا ہے

کہ خسرؤں میں پڑی ہے پکار ہم بھی ہیں

تمہاری ایک نگاہ کرم میں سب کچھ ہے

پڑے ہوئے تو سر رہ گزار ہم بھی ہیں

حسنؔ ہے جن کی سخاوت کی دھوم عالم میں

انہیں کے تم بھی ہو اک ریزہ خوار ہم بھی ہیں