ہے درد مجھے یہ صبح و مسا صنما صنما صنما صنما

ہے درد مجھے یہ صبح و مسا صنما صنما صنما صنما

وہ روئے منور اپنا دکھا صنما صنما صنما صنما

وحدت میں نہاں کثرت میں عیاں سوچو تو میاں وہ ہوگا کہاں

ہر غیب سے ہے وہ جلوہ نما صنما صنما صنما صنما

تری دیکھ جھپک میں مر ہی گیا تری آتش عشق میں جل ہی گیا

تو مجھ میں بقا میں تجھ میں فنا صنما صنما صنما صنما

ہے ارض پہ کل تشبیہ دھری بالائے سماں تنزیہ بھری

ہیں دونوں جمع مجھ میں یکجا صنما صنما صنما صنما

ہے راز جہاں سب مجھ پہ عیاں کیا جن و پری کیا حور و جناں

جب سے کہ یہ دل آئینہ بنا صنما صنما صنما صنما

اک دم میں یہاں سے ہوں میں وہاں اک آن وہاں کا ہوں میں یہاں

میں تجھ میں خلا تو مجھ میں ملا صنما صنما صنما صنما

ہر غیر ہوا ہے تیرا عین وہ عین ترا ہے نورالعین

اس عین میں عین کا ہے نقطہ صنما صنما صنما صنما

سنتے ہیں کہ ہے اک سوداگرؔ تھا خاک رہ کوئے دلبر

کف پا سے ترے اکسیر بنا صنما صنما صنما صنما