مکتوب نمبر ۳

اللہ الصمد کیا اسرار سے واقف لم یلد و لم یولد کے انوار کے ماہر میرے بھائی خواجہ قطب الدین دہلوی! اللہ تعالیٰ آپ کے مدارج زیادہ کرے۔

فقیر پرتقصیر معین الدین سنجری کی طرف سے خوشی و خورمی آمیز اور انس و محبت بھرا سلام ہو، مقصود یہ کہ تادمِ تحریر صحت ظاہری کے سبب مشکور ہوں، اللہ تعالیٰ آپ کو صحت دارین عطا فرمائے۔

بھائی جان! میرے شیخ خواجہ عثمان ہارونی رحمۃ اللہ علیہ فرماتے ہیں سوائے اہل معرفت کے اور کسی کو عشق کے رموزات سے واقف نہیں کر چاہیے، خواجہ شیخ سعدی رحمۃ اللہ علیہ می گوئی نے آنجناب سے پوچھا کہ اہلِ معرفت کو کیونکر پہچان سکتے ہیں تو خواجہ صاحب رحمۃ اللہ علیہ نے فرمایا کہ اہلِ معرفت کی علامت ترک ہے جس میں ترک ہوگی یقیں جانو کہ وہ اہلِ معرفت ہے اور اسے خدا شناسی حاصل ہے اور جس میں ترک نہیں، اس میں معرفت حق کی بو بھی نہیں، یہ اچھی طرح یقین کر لو کہ کلمہ شہادت اور نفی اثبات حق تعالیٰ کی معرفت ہے، مال و مرتبہ بڑے بھاری بت ہیں اور انہوں نے بہت لوگوں کو سیدھی راہ سے گمراہ کیا اور کر رہے ہیں، یہ معبود خلائق بن رہے ہیں، بہت لوگ جاہ و مال کی پرستش کرتے ہیں۔

پس جس نے مال و جاہ کی محبت کو دل سے نکال دیا، اس نے گویا پوری نفی کر دی اور جسے حق تعالیٰ کی معرفت حاصل ہوگئی، اس نے پورا پورا اثبات کر لیا اور یہ بات لا الہ الا اللہ کے کہنے اور اس پر عمل کرنے سے حاصل ہوتی ہے، پس جس نے کلمۂ شہادت نہیں پڑھا اسے خدا شناسی حاصل نہیں ہوئی۔ والسلام