خوشی ہر طرف گھر_بہ_گھر ہو رہی ہے فلک پر بھی رحمت کے بادل ہیں چھائے

خوشی ہر طرف گھر بہ گھر ہو رہی ہے فلک پر بھی رحمت کے بادل ہیں چھائے

کرو پیش مل کر درودوں کے گجرے کہ ہیں مصطفیٰ آج دنیا میں آئے

فضائیں موافق ہوائیں موافق بہاریں موافق گھٹائیں موافق

کرم ہی کرم ہے کہ حق نے ہمارے ہیں برسوں کے سوئے مقدر جگائے

چمن سب ہیں مہکے شجر سب ہیں لہکے وہ چٹکی ہیں کلیاں وہ بلبل ہیں چہکے

یہ رحمت کی ہر سو ہوا چل رہی ہے دلوں کے ہیں قدرت نے غنچے کھلائے

امیروں میں خوشیاں فقیروں میں خوشیاں اسیروں میں خوشیاں ظہیروں میں خوشیاں

کہ وہ خاتم الانبیا بن کے رحمت زمانے میں ہیں آج تشریف لائے

گرا منہ کے بل لات منات ٹوٹا حبل بھی ہوا چور عزہ بھی پھوٹا

ہوا سرد آتش کدہ اور شیطاں ہے روتا پہاڑوں میں منہ کو چھپائے

یہ ختم رسل ہیں یہ شمع سبل ہیں یہ باعث کل ہیں یہ وحدت کے گل ہیں

کرو جان قرباں اے ابرؔ ان پر انہوں نے ہیں برسوں کے اجڑے بسائے