شگفتہ_تر ہے عالم میں عرب کا گلستاں اب بھی

شگفتہ تر ہے عالم میں عرب کا گلستاں اب بھی

ہر اک گل ہے وہاں کا غیرت باغ جناں اب بھی

عرب کے جاہلوں کو نطق حضرت نے جو بخشا تھا

وہی طرز تکلم ہے وہی حسن بیاں اب بھی

وہ چوکھٹ جس پہ سر رکھا محمدؐ کے غلاموں نے

وہ چوکھٹ کہ جو ہے سجدہ گاہ قدسیاں اب بھی

زمانے بھر کے ٹھکرائے ہوؤں کو امن ملتا ہے

حصار عافیت ہے مصطفیٰ کا آستاں اب بھی

وہ صحرا جس میں پہلے نغمۂ توحید گونجا تھا

وہیں جا کر تو ہوگی روح انساں شادماں اب بھی

مجھے مایوس کیا کرتا خیال دوریٔ منزل

کہ میرا جذبۂ شوق شوق زیارت ہے جواں اب بھی

میں اے اشرفؔ کسی کی نعت میں تقلید کرتا ہوں

جدا ہے ہر سخنور سے میرا طرز بیاں اب بھی