سلام ان پر جو چمکے دہر میں بدرالدجیٰ بن کر

سلام ان پر جو چمکے دہر میں بدرالدجیٰ بن کر

سلام ان پر جو آئے مصدر علم و حیا بن کر

سلام ان پر جنہوں نے خلق کی حاجت روائی کی

سلام ان پر جنہوں نے دشمنوں سے بھی بھلائی کی

سلام ان پر کہ جن کے نور سے روشن ہوا عالم

سلام ان پر کہ جو تھے بیکس و مظلوم کے ہمدم

سلام ان پر جو فخر انبیا ہیں نور وحدت ہیں

سلام ان پر کہ جو دونوں جہاں کی شان و عظمت ہیں

سلام ان پر جہاں میں جو پیام امن لائے تھے

سلام ان پر جو راحت اور رحمت بن کے آئے تھے

سلام ان پر جو بے کس بے نواؤں کا سہارا ہیں

سلام ان پر یتیموں اور غلاموں کا جو یارا ہیں

سلام ان پر محبت دہر میں پیغام تھا جن کا

غلاموں بے کسوں کی دستگیری کام تھا جن کا

سلام ان پر جو آئے رحمت اللعالمیں بن کر

تھا اول نور جن کا آئے ختم المرسلیں بن کر

سلام ان پر مرا بے تاب جو آقائے عالم ہیں

امیرالانبیا فخر رسل ہیں حسن آدم ہیں