کیا وقت مبارک ہوتا ہے کیا خوب وہ ساعت ہوتی ہے

کیا وقت مبارک ہوتا ہے کیا خوب وہ ساعت ہوتی ہے

جب ذکر الٰہی ہوتا ہے جب نعت رسالت ہوتی ہے

یاں فرش زمیں پر محفل میں اس نور کی عظمت ہوتی ہے

واں عرش بریں پر ملائک میں مداحوں کی مدحت ہوتی ہے

ایمان بھی تازہ ہوتا ہے دل کو بھی مسرت ہوتی ہے

سب نعمتیں حاصل ہوتی ہیں جب دل میں محبت ہوتی ہے

تھا نور الہٰی صاف عیاں ابلیس مگر منکر ہی رہا

اوصاف نظر آتے ہی نہیں جب دل میں کدورت ہوتی ہے

بوجہل کہے تم سب سے برے صدیق کہے تم سب سے بھلے

آئینہ میں ہوتی ہے عیاں جس طرح کی صورت ہوتی ہے

اس حسن تصور کے قرباں اس فیض محبت کے صدقے

ہر دم ہے وہ روضہ آنکھوں میں ہر وقت زیارت ہوتی ہے

ہو کوئی صحابی یا کہ ولی سب میں ہے عمرؔ خوشبوئے نبیؐ

کھلتی ہے جو اس گلشن میں کلی سب میں وہ نکہت ہوتی ہے