محمدؐ مصطفیٰ کا جانشیں صدیق_اکبر ہے

محمدؐ مصطفیٰ کا جانشیں صدیق اکبر ہے

بجز پیغمبروں کے سب سے اعلیٰ سب سے برتر ہے

زکوٰۃ مال بعد مصطفیٰ صدیق کو دینا

اشارہ ہے خلافت کا یہ ظاہر بلکہ اظہر ہے

پڑی بنیاد مسجد کی رکھا بعد نبی پتھر

ابو بکر و عمر عثمان نے یہ فضل داور ہے

امام المسلمیں اور پیشوائے مرد و زن صدیق

امامت اور کی باطل جہاں صدیق اکبر ہے

خدا نے شان میں صدیق کی اتقیٰ ہے فرمایا

وہ اتقیٰ ہے وہ عند اللہ اکرم اور بہتر ہے

محمدؐ مصطفیٰ پر جب وحی آتی تو سنتے بھی

یہ کتنا مرتبہ صدیق کا اعلیٰ ہے برتر ہے

ہر ایمان صدیق اور ایمان جہاں تولیں

تو غالب سب پہ ہو صدیق کا ایماں کہ اکبر ہے

عمر کی نیکیاں اتنی ہیں جتنے چرخ پر انجم

عمر صدیق کی نیکی ہے یہ فرمان سرور ہے

نہیں پی مے کبھی صدیق نے اسلام سے پہلے

یہ کیسی فطرت اعلیٰ ہے اور طبع مطہر ہے

زمیں پر ایک مردہ بے ارادہ چلتا پھرتا ہے

یہ وجہ اسم عبداللہ ہے اور سر مضمر ہے

اٹھایا صدق نے بار نبوت اپنی مگر دان پر

وہی تو ثانئی اثنین اور ہم راہ پیمبر ہے

کسی نے گر کیا احسان میں نے کر دیا بدلہ

جزا صدیق کو دے گا خدا جو سب سے برتر ہے

نبی داماد والا شان ہیں صدیق اکبر کے

وصال عشق صدیقی کا اس میں راز مضمر ہے

احد میں بدر میں احزاب میں اور جنگ طائف میں

حدیبیہ میں ہر موطن میں ہم راہ پیمبر ہے

طریق قادری اور نقشبندی اور شطاریؔ

مداری کا بھی اعلیٰ رہنما ہے اور رہبر ہے

نبی کے بعد گھل گھل کے ہوئے صدیق بھی راہی

یہ عشق جانستاں ہے سب سے اعلیٰ سب سے برتر ہے

پس مردن ملی ہی جائے آغوش محمدؐ میں

بنا اس خاک سے جس خاک سے جسم پیمبر ہے

ہر منکر ہو کوئی فضل سے صدیق اکبر کے

میں حد مفتری ماروں گا یہ فرمان حیدر ہے

علی مرتضیٰ کے قول پر حسرت کا ہے ایماں

محمدؐ مصطفیٰ کا جانشیں صدیق اکبر ہے