بھرن پھر ابر_رحمت لطف کی برسانے لگتے ہیں

بھرن پھر ابر رحمت لطف کی برسانے لگتے ہیں

جو ہم مشکل میں نام غوث کو دہرانے لگتے ہیں

شرف کے تاج میں وہ بے بہا دردانے لگتے ہیں

جو ذرے پاؤں میں غوث الورا کے آنے لگتے ہیں

یہاں رندوں کے دامن کو نہیں چھوٹی ہے بد مستی

ودودی میکدے میں قادری پیمانے لگتے ہیں

عجب جائے سکوں ہے آستانہ غوث اعظم کا

جو آئیں سایۂ دیوار میں سستانے لگتے ہیں

طریقت میں دو آنکھیں ہیں ہماری غوث اور خواجہ

جو دیکھیں ایک سے وہ لوگ ہم کو کانے لگتے ہیں

خدا نے ان کو بخشی ہے کچھ ایسی شان محبوبی

جو دل آتے ہیں در پہ غوث کے نذرانے لگتے ہیں

تعالیٰ اللہ پائے غوث سے پامال ہونے کو

سر اتنے جھکتے ہیں اسعدؔ زمیں سے شانے لگتے ہیں