جس کی عظمت دیکھ کر عقل و خرد حیران ہے

جس کی عظمت دیکھ کر عقل و خرد حیران ہے

وہ حبیبِ کبریا کونین کا سلطان ہے

دےرہی ہے یہ سبق لا یُو مِنُ والی حدیث

سرورِ دیں کی محبت حاصل ایمان ہے

بے خرد ہے، بے نظر ہے بے ادب وہ آدمی

جس کا کہنا ہو نبی میری طرح انسان ہے

ہجر کی شب میں امیدِ وصل کا روشن چراغ

دیکھ کر بے تابیاں میری بہت حیران ہے

ناخدائے کشتیِٔ مظلوم ہو چشمِ کرم

بحر بے پایاں ہے ساحل دور ہے طوفان ہے

روضۂ سرکار کی جانب ہے امت کی نظر

امتیازِ بیش وکم کی بس یہی میزان ہے

آستانِ مصطفیٰ پر دل کی سجدہ ریزیاں

کم نہ ہو حسنِ عقیدت کی یہی پہچان ہے

اپنے چہرہ سے ہٹائے کیوں غبارِ کارواں

راہِ طیبہ کا مسافر بھی کہیں نادان ہے

جلوۂِ رُخ کی عطا کردیں وہ شبنمؔ کو چمک

روح کا تن سے نکلنا پھر بہت آسان ہے