وہی بے_ہوش ہے جو آپ کا مستانہ نہیں

وہی بے ہوش ہے جو آپ کا مستانہ نہیں

خود وہ دیوانہ ہے جو آپ کا دیوانہ نہیں

دوست ہوتے ہیں فدا جلتے ہیں دشمن تجھ سے

کون ہے وہ جو ترے حسن کا پروانہ نہیں

روز روشن کی طرح تیرا نمایاں ہے کمال

کور باطن ہے وہ جس نے تجھے پہچانا نہیں

لا ادھر جام کہ نا اہل ہیں منکر ساقی

در خور ہر کس ناکس ترا پیمانہ نہیں

شور واعظ ہے اسی وقت تک اے پیر مغاں

گونجا جب تک کہ ترا نعرۂ مستانہ نہیں

خود ہی مٹ جائیں گے سب حق کے مٹانے والے

لاکھ کوشش کریں مٹتا ترہ افسانہ نہیں

کرتے ہیں اہل حسد تیری ہوا خیزی کیا

ممکن ان ذروں سے خورشید کا چھپ جانا نہیں

اس زمانہ میں ہے محروم ازل یہ شناخت

یعنی جو معتقد حضرت مولانا نہیں

شاہ صاحب جو سمجھتا ہے تو بھک منگوں کو

تو نے دیکھی وہ ابھی صورت شاہانہ نہیں