حیات_افزا نگار_شہر_سرکار_مدینہ ہے

حیات افزا نگار شہر سرکار مدینہ ہے

سحاب رحمت باری یہاں ہر دم برستا ہے

دیار سید کونین کو رفعت ملی ایسی

کہ اوج آسماں بھی جس کے آگے سر نہادہ ہے

ضیائے ذرۂ پا پوشِ محبوبِ دو عالم سے

جبین ماہ دو ہفتہ کی طلعت رشک افزا ہے

شہنشاہ مدینہ کی محبت سب پہ غالب ہو

مسلمانو کمال مومنیت کا تقاضا ہے

طلب گار نوید جنت الفردوس میں بھی ہوں

مجھے ان کی گلی میں جا کے مرنے کی تمنا ہے

پھڑکتی ہے رگ مدحت لوائے نعت کے نیچے

گروہ حضرت حساں سے میرا بھی علاقہ ہے

طلب سے بھی سوا پاتے ہیں آکر ساٸلین دہر

ہمیشہ جوش پر بحر عطائے شاہ طیبہ ہے

مٸے حب شہ بغداد کی تاثیر مت پوچھو

نہ اترے زندگی بھر اس کے اندر ایسا نشہ ہے

ہوا جو بھی اسیر گیسوئے واللیل اے واصفؔ

وہ زندان غم و آلام سے آزاد رہتا ہے