جان_گل جان_فصل_بہاراں سرور_انبیا آ رہے ہیں

جان گل جان فصل بہاراں سرور انبیا آ رہے ہیں

تہنیت پیش ہے اہل ایماں سرور انبیا آ رہے ہیں

کس قدر لطف آور ہے موسم نصب ہیں ہر سو خوشیوں کے پرچم

ہے فضائے جہاں نور افشاں سرور انبیا آ رہے ہیں

جن کے سر پر ہے تاج رفعنا جن کی تبشیر دیتے ہیں عیسیٰ

رب کی کل سلطنت کے وہ سلطاں سرور انبیا آ رہے ہیں

جھوم کر برسا ہے ابر رحمت کھل رہے ہیں گل خیر و برکت

لہلہانے لگی کشت ویراں سرور انبیا آ رہے ہیں

شمع ظلمت لگی ٹمٹمانے امن کا ہر سو پھیلا اجالا

یعنی انصاف کا مہر تاباں سرور انبیا آ رہے ہیں

جشن یوم ولادت مناؤ گھر گلی اور محلے سجاؤ

شاہراہوں پہ بھی ہو چراغاں سرور انبیا آ رہے ہیں

ختم ہو جائے گی یاس و حسرت اور عطا ہو گا جام مسرت

ہو گا پورا ہر اک دل کا ارماں سرور انبیا آ رہے ہیں

جہل کا اب چھٹے گا اندھیرا چار سو ہوگی بس ضو اقرا

علم کی لے کے شمع درخشاں سرور انبیا آ رہے ہیں

ہاتھ آیا ہے خوشیوں کا گوہر سر پہ واصفؔ ہے رحمت کی چادر

قلب اہل محبت ہے شاداں سرور انبیا آ رہے ہیں