اعتراض مریداں بر خلوت وزیر

وزیر کی خلوت کے متعلق مریدوں کا دو بارہ خوشامد کرنا

سب نے کہا اے وزیر! انکار نہیں ہے

ہماری بات غیروں کی سی بات نہیں ہے

تیری جدائی سے آنکھوں کے آنسو بہ رہے ہیں

جان سے آہ آہ نکل رہی ہے

بچہ دایہ سے نہیں لڑتا لیکن

وہ روتا ہے اگرچہ اچھا برا نہیں جانتا ہے

ہم سارنگی کی طرح ہیں اور تو مضراب مارتا ہے

رونا ہمارا نہیں ہے تو روتا ہے

ہم بانسری کی طرح ہیں اور ہم میں آواز تجھ سے ہے

ہم پہاڑ کی طرح ہیں اور ہم میں گونج تجھ سے ہے

ہار جیت میں ہم شطرنج کی طرح ہیں

اے خوش صفات ! ہماری ہار جیت تیری طرف سے ہے

اے وہ کہ تو ہماری جان کی جان ہے ہم کیا ہوتے ہیں ؟

تیرے ہوتے ہوئے ، درمیان میں ہم کون ہوتے ہیں

ہم اور ہماری ہستیاں معدوم ہیں

تو فانی نما ، وجود مطلق ہے

ہم سب شیر ہیں لیکن جھنڈے کے شیر

جس کا مسلسل حملہ ہوا کی وجہ سے ہوتا ہے

ان کا حملہ نظروں میں ظاہر ہے اور ہوا نظر سے غائب ہے

وہ ذات جو کہ نظروں سے غائب ہے کبھی (دل سے) گم نہ ہو

ہماری ہوا اور ہمارا وجود تیری عطا سے ہے

ہم سب کی ہستی تیری ایجاد سے ہے

تو نے معدوم کو وجود کی لذت چکھائی

تو نے معدوم کو اپنا عاشق بنایا تھا

اپنے انعام کی لذت کو واپس نہ لے

شراب کے نقل اوراپنے جام کو واپس نہ لے

اور اگر تو لے لے کون ہے جو جستجو کر سکے؟

نقش، نقاش کے ساتھ کیا زور آزمائی کرے ؟

ہمیں نہ دیکھ ، ہم پر نظر نہ کر

اپنے اکرام اور سخاوت کو دیکھ

نہ ہم تھے نہ ہمارا تقاضا تھا

تیری مہربانی ہماری ان کہی سنتی تھی

نقش، نقاش اورقلم کے سامنے ہوتا ہے

عاجز اورمجبور جس طرح بچہ پیٹ میں

قدرت کے سامنے ، عالم کی تمام مخلوقات

عاجز ہیں ، جس طرح سوئی کے سامنے کڑھائی کا کپڑا

کبھی شیطان کا ، کبھی آدم کا نقش بناتا ہے

کبھی خوشی کا اور کبھی غم کا نقش کھینچتا ہے

کوئی ہاتھ نہیں جو روکنے کو ہاتھ ہلائے

گویائی نہیں ، جو نفع اور نقصان پر دم مارے

تو قرآن سے (اس ) شعر کی تفسیر پڑھ لے

اللہ نے فرمایا تو نے نہیں پھینکا جب تو نے پھینکا

اگر ہم تیر چلائیں تو وہ ہماری وجہ سے کب ہے؟

ہم تو کمان ہیں ، اور تیر چلانے والا خدا ہے

یہ جبر نہیں ہے ، یہ جباری کے معنی ہیں

جباری کا ذکر (انسان کا) عجز ظاہر کرنے کے لئے ہے

ہمارا عجز، اضطرار کی دلیل ہے

ہماری شرمندگی ، اختیار کی دلیل ہے

اگر اختیار نہوتا تو یہ شرم کیا ہے ؟

اور یہ افسوس اور شرمندگی اور صلح جوئی کیا ہے ؟

استادوں کی جھڑکی ، شاگردوں کو کیوں ہے

تدبیروں میں طبیعتیں سرگرداں کیوں ہے

اگر تو کہے ، وہ جبر سے غافل ہے

اللہ کا چاند اس کو اپنے ابر میں چھپا دیتا ہے

اگر تو سنے تو اس کا (بھی) اچھا جواب ہے

تو کفر سے بچ جائے گا اور دین پر مائل ہوجائیگا

حسرت اور عاجزی جو بیماری میں ہے

بیماری کا وقت پوری بیداری ہے

جس وقت تو بیمار ہوتا ہے

تو گناہ سے توبہ کرتا ہے

تیرے اوپر گناہ کی برائی کھل جاتی ہے

تو ارادہ کرتا ہے کہ راہِ راست پر لوٹ آؤں گا

تو عہد اور پیماں کرتا ہے کہ اس کے بعد

عبادت کے علاوہ کوئی کام نہ کروں گا

لہٰذا یقین ہوگیا کہ تیری بیمار

تجھے ہوش اور بیداری بخشتی ہے

اے راز کے طالب، اس حقیقت کو سمجھ لے

جس میں درد ہے اس کو پتہ مل گیا ہے

جو زیادہ ہوشمند ہے وہی زیادہ پر درد ہے

جو زیادہ باخبر ہے اس کا چہرہ زیادہ زرد ہے

اگر تو اس کے جبر کا معتقد ہے تو تیری عاجزی کہاں ہے؟

تیری مجبوری کی زنجیر کی جھنکار کہاں ہے ؟

زنجیر سے جکڑا ہوا، سخاوت کیسے کرتا ہے ؟

ٹوٹی ہوئی لکڑی ستون کب بن سکتی ہے؟

اگر تو دیکھتا ہے کہ تیرے پیر باندھ دیے ہیں

تجھ پر بادشاہ کے سپاہی مسلط ہیں

لہٰذا تو کمزوروں پر سپاہی نہ بن

اس لئے کہ یہ عاجزوں کی طبیعت اورعادت نہیں ہوتی ہے

جب تو اس کا جبر نہیں دیکھتا ہے ، تو قائل نہ ہو

اور اگر تو دیکھتا ہے ، تو دیکھنے کی دلیل کہاں ہے؟

جس کام میں تیرا میلان ہوتا ہے اس میں

تو اپنی قدرت کو کھلا دیکھتا ہے

جس کام میں تیری خواہش اور میلان نہیں ہے

اس میں تو جبری بنتا ہے کہ یہ خدا کی جانب سے ہے

انبیاء دنیا کے کام میں جبری ہیں

کافر، آخرت کے کام میں جبری ہیں

انبیاء کے لیے آخرت کے کام اختیاری ہیں

کافروں کے لئے دنیا کے کام اختیاری ہیں

کیونکہ ہر پرندہ اپنی جنس کی طرف

پیچھے پیچھے جاتا ہے اور جان آگے آگے

کافر، چونکہ سجین کی جنس کے ہیں

دنیا کے قید خانہ کے قوانین خوب سمجھتے ہیں

انبیاء چونکہ علیین کی جنس کے تھے

اس لئے وہ دل و جان سے علیین کی طرف متوجہ ہوئے

اس بات کی تو کوئی انتہا نہیں ہے

لیکن ہم پھر اس باقی قصہ کو سناتے ہیں