حکایت مرد بقال و طوطی و روغن ریختن طوطی در دکان

ایک بنئے اور طوطی کا قصہ اور طوطی کا دکان کے اندر تیل بہانا

ایک بنیا تھا اور اس کی ایک طوطی تھی

جو خوش آواز ، سبز رنگ اور بولنے والی طوطی تھی

(یہ طوطی) دکان پر دکان کی حفاظت کرتی تھی

اور تمام سوداگروں سے دلچسپ باتیں کرتی تھی

وہ آدمیوں سے خطاب کرنے میں ان جیسی باتیں کرتی

اور طوطیوں کے ساتھ نوا سنجی میں ماہر تھی

بھاگنے کے لیے دکان کی بیچ میں کودی

(اور) روغن گل کی شیشیاں بہا دیں

اس کا مالک گھر سے (واپس) آیا

(اور) خوش خوش، اطمینان سے دکان پر بیٹھ گیا

(لیکن) دکان کو تیل سے پر اور کپڑوں کو چکنا دیکھ کر

اس کے سر پر ایسی مار لگائی کہ طوطی گنجی ہو گئی

چند دن تک (طوطی) نے بات کرنی چھوڑ دی

بنئے نے ندامت و افسوس سے آہ کی

وہ (اپنی) داڑھی کو نوچتا اور کہتا تھا ہائے افسوس

میری نعمت کا سورج بدلی میں آگیا

اس وقت میرے ہاتھ ٹوٹ گئے ہوتے

جب میں نے اس خوش زبان (طوطی) کے سر پر ضربیں ماری تھیں

وہ ہر فقیر کو تحفے تقسیم کر رہا تھا

تاکہ اپنے طوطی کی گویائی کو پا لے

تین دن اور تین رات کے بعد حیران و بدحال

مایوسی کی حالت میں دکان پر بیٹھا تھا

ہر قسم کی انوکھی چیزیں اس پرندے کو دکھاتا تھا

اور پھر تعجب سے اپنے ہونٹ کاٹتا تھا

اتفاقاً ایک گدڑی پوش ادھر سے گذر رہا تھا

جس کا سر پرات اور طشت کی پشت کی طرح (بالوں) سے صاف تھا

طوطی (اس کو دیکھ کر) فوراً بول پڑی

اس کو پکارا اور عقلمندوں کی طرح (سوال کیا)

اے گنجے ! تو گنجوں میں کیوں شامل ہوا ؟

شاید تو نے بھی شیشی سے تیل گرایا ہے

اس کے اس قیاس سے لوگ ہنس پڑے

کہ اس نے گدڑی والے کو اپنا جیسا سمجھا

پاک لوگوں کے کام کو اپنے پر قیاس نہ کر

اگرچہ لکھنے میں شیر(درندہ) اور شیر(دودھ) یکساں ہوتا ہے

اس وجہ سے پورا عالم گمراہ ہو گیا

بہت کم کوئی خدا کے ابدال سے واقف ہوا

(انہوں نے) نبیوں کے ساتھ برابری کا دعویٰ کھڑا کر دیا

اور اولیا کو اپنا جیسا سمجھ لیا

یہ کہا کہ ہم بھی انسان ہیں اور وہ بھی انسان ہیں

ہم اور وہ سونے اور کھانے کے پابند ہیں

اندھے پن سے وہ یہ نہ سمجھے

کہ ان دونوں میں بے انتہاء فرق ہے

دونوں قسم کی بھڑوں نے ایک ہی جگہ سے کھایا

لیکن اس سے ڈنک اور اس سے شہد بنا

دونوں قسم کے ہرنوں نے گھاس، اور پانی کھایا پیا

اس ایک کا گوبر بنا اور دوسرے کا خالص مشک

دونوں نرسلوں نے ایک گھاٹ سے پانی پیا

لیکن ایک کھوکھلی اور دوسری شکر سے بھری ہوئی ہے

اس طرح کی لاکھوں مثالیں تیرے سامنے ہیں

(لیکن) ان میں ستر سالہ راہ کا فرق دکھائی دیتا ہے

یہ کھاتا ہے تو نجاست اس سے نکلتی ہے

اور وہ جو کچھ کھاتا ہے ، سب خدا کا نور بن جاتا ہے

یہ کھاتا ہے تو سراسر بخل اور حسد پیدا ہوتا ہے

اور وہ کھاتا ہے تو سب خدا کا عشق بن جاتا ہے

یہ پاک زمین ہے اور وہ شور اور خراب

یہ پاک فرشتہ ہے اور وہ بھوت اور درندہ

دونوں صورتیں اگر ایک جیسی ہیں، ٹھیک ہے

نمکین اور شیریں پانی میں صفائی موجود ہے

سوائے صاحبِ ذوق کے کوئی نہیں پہچان سکتا ہے ، سمجھ لے

کہ وہی میٹھے اور کھارے پانی کو پہچانتا ہے

جادو کو معجزہ پر قیاس کر کے

دونوں کی بنیاد مکر و فریب پر سمجھتا ہے

جادوگروں نے موسیٰؑ سے لڑائی کے لیے

ان کی لاٹھی جیسی لاٹھی اٹھائی

(لیکن) اس لاٹھی اور اس لاٹھی میں گہرا فرق ہے

اس کام میں اور اس کام میں بڑا فاصلہ ہے

اس کام کے پیچھے اللہ کی لعنت ہے

اس کام میں اللہ کی رحمت شاملِ حال ہے

کافر لوگ جھگڑا کرنے میں بندر کی خصلت رکھتے ہیں

(اور ان کی یہ خصلت) سینہ میں چھپی ہوئی ایک آفت ہے

جو کچھ انسان کرتا ہے بندر بھی کرتا ہے

جو انسان سے پے در پے دیکھتا ہے وہ کرتا ہے

اس نے گمان کیا کہ میں نے اس کی طرح کیا

وہ لڑاکا فرق کو کب دیکھتا ہے؟

یہ (مومن) حکم خداوندی سے کرتا ہے اور وہ (کافر) جھگڑے کے لیے

جھگڑا کرنے والوں کے سر پر خاک ڈال

وہ منافق مومن کے ساتھ، نماز میں

مقابلہ کے لیے آتا ہے نہ کہ نیاز مندی کے لیے

نماز اور روزہ اور حج اور زکوٰۃ میں

مومن، منافق کے ساتھ جیت اورہار میں ہیں

انجام کار مومنوں کی جیت ہوگی

آخرت میں منافق کو ہار ہوگی

اگرچہ دونوں ایک بازی لگائے ہوئے ہیں

لیکن یہ دونوں مرد اور رے کے باشندوں کی طرح (باہم مختلف) ہیں

ہر ایک اپنے مقام کی طرف جاتا ہے

ہر ایک اپنے نام کے مطابق کام کرتا ہے

تو اس کو مومن کہے تو اس کی روح خوش ہوتی ہے

اور اگر منافق کہے تو مشعلی اور آگ سے پر ہوجاتا ہے

اس کا نام اس کی ذات کی وجہ سے پیارا ہے

اور اس کانام اس کی آفتوں کی وجہ سے موجب بغض و عداوت ہے

میم اور واؤ اور میم اور نون میں کوئی شرافت نہیں ہے

لفظ مومن پہچان کے علاوہ اور کچھ نہیں ہے

اگر اس کو منافق کہے تو یہ ذلیل نام

بچھو (کے ڈنک) کی طرح اس کے دل میں چبھتا ہے

اگر وہ نام دوزخ سے نہیں بنا ہے

پھر اس میں دوزخ کا ذائقہ کیوں ہے ؟

برے نام کی برائی حروف کی وجہ سے نہیں ہے

اور اس سمندری پانی کی کڑواہٹ برتن کی وجہ سے نہیں ہے

حروف برتن ہیں اور ان میں معنی پانی کی طرح ہیں

معنی کا سمندر وہ ہے جس کے پاس ام الکتاب ہے

میٹھا اور شور دریا ساتھ ساتھ رواں ہے

اور ان کے درمیاں ایک آڑ ہے ، یہ ایک دوسرے سے چڑھتے نہیں

جان لے کہ یہ دونوں ایک ہی اصل سے رواں ہیں

دونوں سے گذر کر ان کی اصل تک پہنچ گیا

کھوٹا سونا اور کھرا سونا پرکھنے میں

بغیر کسوٹی کے ہرگز قابلِ اعتبار نہیں

خدا جس کے دل میں کسوٹی رکھ دیتا ہے

بلاشبہ وہ یقین کو شک سے جدا کر لیتا ہے

زندہ کے منہ میں اگر تنکا گر جائے

تو اس کو چین اسی وقت آتا ہے جب اس کو باہر نکال دے

ہزاروں لقموں میں ایک چھوٹا سا تنکا

جب آیا تو زندہ کی حس نے اس کاپتہ لگا لیا

دنیا کا احساس، اس جہاں کی سیڑھی ہے

اور آخرت کا احساس، آسمان کی سیڑھی ہے

اس حس کی تندرسی طبیب سے معلوم کرو

اور اس حس کی تندرستی محبوب سے معلوم کرو

اس حس کی تندرستی بدن کی تندرستی سے ہے

اور اس حس کی تندرستی بدن کی شستگی سے ہے

روح کا بادشاہ، جسم کو ویران کرتا ہے

اور اس کی ویرانی کے بعد اس کو آباد کرتا ہے

سونے کے خزانہ کے لیے اس نے اپنے گھر کو ویران کیا

اور اسی خزانہ سے پھر اس کو بہت زیادہ آباد کردیتا ہے

اس نے پانی کو بند کیا اور نہر کو پاک کیا

پھر اس نے نہر میں پینے کا پانی چھوڑ دیا ہے

کھال میں شگاف کیا ، تیر کو کھینچا

اس کے بعد نئی کھال اس سے پیدا ہوگئی

اس نے قلعہ کو ویران کیا اور کافر سے چھینا ہے

اس کے بعد اس پر سینکڑوں برج اور فصیلیں بنائی ہیں

یکتا کے کام کی کیفیت کون بیان کرے ؟

یہ جو کچھ میں نے کہا ہے بضرورت کہا ہے

کبھی یوں جلوہ آرا ہوتا ہے اور کبھی اس کے برعکس

دین کا کام حیرت کے بغیر نہیں ہے

نہ ایسے حیران کہ ان کی پشت اس کی طرف ہو

بلکہ ایسے حیران کہ ان کا چہرہ اس کے سامنے ہے

اس ایک کا رخ دوست کی جانب ہوا

اور اس ایک کا اپنا رخ خود دوست کا رخ ہے

ہر ایک کے رخ کو دیکھ اور ادب کر

ہو سکتا ہے کہ تو خدمت سے صاحبِ معرفت بن جائے

چونکہ بہت سے شیطان انسانی چہرے کے ہیں

اس لئے ہر ہاتھ میں ہاتھ نہ پکڑا نا چاہئے

شکاری پرندے جیسی آواز اس لئے نکالتا ہے

تاکہ وہ پکڑنے والا ، پرندے کو دھوکا دے

وہ پرندہ اپنے ہم جنس کی آواز سنتا ہے

(اور) فضا سے اترتا ہے تو جال اورڈنک پاتا ہے

کمینہ آدمی فقراء کے کلمات چرا لیتا ہے

تاکہ کسی بھولے بھالے پر وہ منتر پڑھے

مردوں کا کام روشنی اور گرمی (پہنچانا) ہے

(اور) کمینوں کا کام (دھوکا دینا) اور بے شرمی ہے

گدا گری کے لیے اون کا شیر بناتے ہیں

مسیلمہ(کذاب) کو احمد کا لقب دیتے ہیں

مسیلمہ کا لقب کذاب رہا

اور (محمد صلی اللہ علیہ وسلم) کا صاحب عقل رہا

وہ حق کی شراب ہے جس کی مہر خالص مشک کی ہے

(اور) شراب کی مہر گندگی اور عذاب ہے