حکایت‌ نے

بانسری کا قصہ

بانسری سے سن ! کیا بیان کرتی ہے

وہ جدائیوں کی (کیا) شکایت کرتی ہے !

کہ جب سے مجھے بنسلی سے کاٹا ہے

میرے نالہ سے مرد و عورت (سب) روتے ہیں

میں ایسا سینہ چاہتی ہوں جو جدائی سے پارہ پارہ ہو

تاکہ میں عشق کے درد کی تفصیل سناؤں

جو کوئی اپنی اصل سے دور ہوجاتا ہے

وہ اپنے وصل کا زمانہ پھر تلاش کرتا ہے

میں ہر مجمع میں روئی

خوش اوقات اور بداحوال لوگوں کے ساتھ رہی

ہر شخص اپنے خیال کے مطابق میرا یار بنا

اور میرے اندر سے میرے رازوں کی جستجو نہ کی

میرا راز، میرے نالہ سے دور نہیں ہے

لیکن آنکھ اور کان کے لیے وہ نور نہیں ہے

بدن، روح سے اور روح، بدن سے چھپی ہوئی نہیں ہے

لیکن کسی کے لئے روح کو دیکھنے کا دستور نہیں ہے

بانسری کی یہ آواز آگ ہے، ہوا نہیں ہے

جس میں یہ آگ نہ ہو، وہ نیست (ونابود) ہو

عشق کی آگ ہے جو بانسری میں لگی ہے

عشق کا جوش ہے جو شراب میں آیا ہے

بانسری، اس کی ساتھی ہے جو یار سے کٹا ہو

اس کے راگوں نے ہمارے دل کے پردے پھاڑ دیئے

بانسری جیسا زہر اور تریاق کس نے دیکھا ہے ؟

بانسری جیسا ساتھی اور عاشق کس نے دیکھا ہے ؟

بانسریِ خطرناک راستہ کی بات کرتی ہے

مجنوں کے عشق کے قصے بیان کرتی ہے

اس ہوش کا رازداں بیہوش کے علاوہ کوئی نہیں ہے

زبان کا خریدار کان جیسا کوئی نہیں ہے

ہمارے غم میں بہت سے دن ضائع ہوئے

بہت سے دن سوزشوں کے ساتھ ختم ہوئے

دن اگر گزریں تو کہہ دو گذریں پروا نہیں ہے

اے وہ کہ تجھ جیسا کوئی پاک نہیں ہے ، تو رہے!

جو مچھلی کے علاوہ ہے اس کے پانی سے سیر ہوا

جو بے روزی ہے اس کا وقت ضائع ہوا

کوئی ناقص ، کامل کا حال نہیں معلوم کر سکتا

پس بات مختصر چاہئے ، والسلام

اے بیٹا! قید کو توڑ، آزاد ہوجا

سونے ، چاندی کا قیدی کب تک رہےگا؟

اگر تو دریا کو ایک پیالے میں ڈالے

کتنا آئے گا ؟ ایک دن کا حصہ

حریصوں کی آنکھ کا پیالہ نہ بھرا

جب تک سیپ نے قناعت نہ کی موتی سے نہ بھرا

جس کا جامہ عشق کی وجہ سے چاک ہوا

وہ حرص اور عیب سے بالکل پاک ہوا

خوش رہ ، ہمارے اچھے جنون والے عشق !

اے! ہماری تمام بیماریوں کے طبیب

اے ہمارے تکبر اور عزت طلبی کی دوا!

اے کہ تو ہمارا افلاطون اور جالینوس ہے !

خاکی جسم عشق کی وجہ سے آسمانوں پر پہنچا

پہاڑ، ناچنے لگا اور ہوشیار ہوگیا

اے عاشق! عشق طور کی جان بنا

طور مست بنا اورموسیٰ بیہوش ہو کر گرے

اگر میں اپنے یار کے ہونٹ سے ملا ہوا ہوتا

بانسری کی طرح کہنے کی باتیں کہتا

جو شخص دوست سے جدا ہوا

بے سہارا ہوا ، خواہ سو سہارے رکھے

جب پھول ختم ہوا اور باغ ویران ہوگیا

اس کے بعدتو بلبل کی سرگذشت نہ سنے گا

تمام کائنات معشوق ہے اور عاشق پردہ ہے

معشوق زندہ ہے اور عاشق مردہ ہے

جب عشق کو اس کی پروا نہ ہو

وہ بے پر کے پرندے کی طرح ہے ، اس پر افسوس ہے

میں کیا کہوں کہ میں آگے پیچھے کا ہوش رکھتا ہوں

جب کہ میرے دوست کا نور ساتھی نہ ہو

عشق چاہتا ہے کہ یہ بات ظاہر ہو

تیرا آئینہ غماز نہ ہو تو کیوں کر ہو؟

تو جانتا ہے تیرا آئینہ غماز کیوں نہیں ہے

اس لئے کہ زنگ اس کے چہرے سے علیحدہ نہیں ہے

اے دوستو اس قصہ کو سنو

وہ خود ہمارے موجودہ حال کی حقیقت ہے