عتاب کردن آتش را آں بادشاه جہود

یہودی (بادشاہ) کا آگ پر غصہ کرنا کہ کیوں نہیں جلاتی اور اس کا جواب

بادشاہ آگ کی طرف متوجہ ہوا کہ اے بد مزاج

تیری دنیا کو جلانے والی فطری عادت کہاں ہے ؟

تو جلاتی کیوں نہیں، تیری خاصیت کہاں گئی

یا ہمارے نصیب سے تیری نیت بدل گئی

تو آگ کے پوجنے والے کو بھی نہیں بخشتی ہے

جو تجھے نہیں پوجتا وہ کیوں بچ گیا

اے آگ ! تو صبر کرنے والی ہرگز نہیں ہے

کیوں نہیں جلاتی ہے ؟ کیا ہے جو تو قادر نہیں ہے ؟

ہائے تعجب ! یہ نظر بندی ہے یا حواس بندی

ایسا بلند شعلہ جلاتا کیوں نہیں ہے ؟

کسی نے تجھ پر جادو کیا ہے یا طلسم

یا تیرا طبیعت کے خلاف (کام) ہمارے نصیبہ کی وجہ سے ہے؟

آگ نے کہا میں وہی آگ ہوں

اندر آجا، تاکہ تو میری گرمی دیکھے

میری طبیعت اور اصل نہیں بدلی ہے

میں خدا کی تلوار ہوں ، اجازت ہی سے کاٹتی ہوں

ترکمانوں کے کتے،خیمہ کے دروازہ پر

مہمان کے آگے خوشامد کرتے ہیں

اگر خیمہ کے پاس سے اجنبی گذرتا ہے

تو وہ کتوں سے شیروں جیسا حملہ دیکھتا ہے

میں غلامی میں، کتے سے کم نہیں ہوں

اللہ تعالیٰ زندہ ہونے میں کسی ترک سے کم نہیں ہے

اگر تیرے مزاج کی آگ تجھے غمگین کرتی ہے

دین کے مالک کے حکم سے سوزش کرتی ہے

اگر تیرے مزاج کی گرمی، خوشی دیتی ہے

دین کا مالک ، اس میں خوشی رکھ دیتا ہے

جب تو غم دیکھے، توتوبہ کر

غم، خدا کے حکم سے کام کرتا ہے

جب وہ چاہتاہے عین غم، خوشی بن جاتا ہے

خود بیڑی، آزادی بنجاتی ہے

ہوا، مٹی، پانی اور آگ غلام ہیں

میرے اور تیرے اعتبار سے مردہ ہیں ، لیکن اللہ کے نزدیک زندہ ہیں

آگ ، اللہ کے سامنے ہمیشہ کھڑی ہے

عاشق کی طرح، بے جان، دن اور رات مسلسل

تو لوہے پر پتھر ماریگا آگ نکلے گی

وہ بھی خدا کے حکم سے باہر نکلتی ہے

ظلم کے لوہے اور پتھر کو باہم نہ ٹکرا

اس لئے کہ دونوں مرد اور عورت کی طرح بچے دیتے ہیں

پتھر اور لوہا خود سبب ہیں لیکن

اے نیک مرد ! تو زیادہ اونچا دیکھ

اس لئے کہ اس سبب کو اس سبب نے پیدا کیا ہے

کوئی سبب، بلا کسی سبب کے خود بخود کب ہواہے؟

وہ اسباب جو انبیاء کے رہنما ہیں

وہ اسباب، ان اسباب سے بالا تر ہیں

اس سبب کو وہ سبب ، عمل کرنے والا بناتا ہے

پھر کبھی بے پر ، اور معطل بنا دیتا ہے

اس سبب سے ہماری عقل واقف ہے

اور ان اسباب کو انبیاء جانتے ہیں

یہ سبب کیا ہوتا ہے ؟ عربی میں کہہ دے رسی

اس کنویں میں یہ رسی تدبیر سے آئی ہے

گھیڑی کی گردش ، اس رسی کی علت ہے

گھیڑی گھمانے والے کو نہ دیکھنا غلطی ہے

دنیا میں ان اسباب کی رسیوں کو

ہرگز ہرگز، اس گھومنے والے چرخ (آسمان) کی وجہ سے نہ جاننا

تاکہ تو خالی ، اور آسمان کی طرح سرگرداں نہ رہے

اور بے عقلی کی وجہ سے مرخ کی طرح نہ جلے

ہوا اور آگ اللہ کے حکم سے وجود میں آتے ہیں

اللہ کی شراب سے دونوں مست ہیں

اے بیٹا ! بردباری کا پانی اور غصہ کی آگ

بھی تو اللہ کی جانب سے دیکھے گا اگر آنکھ کھولے گا

ہوا کی جان ، اگر اللہ سےو اقف نہ ہوتی

قوم عام ( کے نیک و بد) میں کب فرق کرتی ؟