مکر دیگر انگیختن وزیر در اضلال قوم

وزیر کا مکرر کرنا اور تنہائی میں بیٹھنا

دوسرا مکر اس وزیر نے اختیار کیا

وعظ کہنا چھوڑا، تنہائی میں بیٹھ گیا

مریدوں میں شوق کی سوزش ڈال دی

چالیس پچاس روز تک تنہائی میں رہا

اس کے شوق سے لوگ دیوانے ہوگئے

حال اور گفتگو اور اس کے ذوق کی جدائی سے

لوگ خوشامد اور عاجزی کرتے تھے اور وہ

مجاہدہ کی وجہ سے تنہائی میں کبڑا ہو گیا تھا

انہوں نے کہا تیرے بغیر ہمارے لیے روشنی نہیں ہے

لاٹھی پکڑنے والے کے بغیر نابینا کا حال کیا ہوگا ؟

از راہِ مہربانی اور خدا کے لیے

اس سے زیادہ ہم کو اپنے سے جد انہ کر

ہم بچوں کی طرح ہیں اور تو ہماری دایہ ہے

وہی سایہ تو ہمارے اوپر ڈال دے

اس نے کہا میری جان دوستوں سے دور نہیں ہے

لیکن باہر آنے کا میرے لئے حکم نہیں ہے

وہ امیر سفارش کے لئے آئے

اور وہ مرید عاجزی کرنے لگے

کہ اے بزرگ! یہ ہماری کیسی بدبختی ہے

ہم دل اور دین سے تیرے بغیر محروم رہ گئے

تو تو بہانہ کر رہا ہے اور ہم درد سے

دل کی جلن سے ٹھنڈی آہیں بھر رہے ہیں

ہمیں تیری میٹھی باتوں کی عادت ہوگئی ہے

ہم نے تیری دانائی کا دودھ پیا ہے

خدا کے لئے یہ ظلم ہم پر نہ کر

مہر بانی کر، اور آج کو کل پر نہ ٹال

کیا تیرے دل اس کی اجازت دیتا ہے کہ یہ بیدل

تیرے بغیر محروموں میں شامل ہوجائیں ؟

سب ایسے تڑپ رہے ہیں جیسے مچھلی خشکی میں

پانی کھول دے اور نہر سے بند اٹھا دے

اے وہ کہ دنیا میں تجھ جیسا کوئی نہیں ہے !

خدا کے لئے لوگوں کی فریاد سن لے