نظر کردن شیر در چاه و دیدن عکس خود را و آں خرگوش را در آب

شیر کا کنویں میں جھانکنا اور اپنے اور اس خرگوش کے عکس کو دیکھنا

جب شیر نے اُس کو اپنی بغل میں لے لیا

شیر کی حفاظت میں وہ کنویں تک دوڑا

جب اُنہوں نے کنویں کے پانی میں دیکھا

پانی میں، شیر اور اُس کی جھلک دکھائی دی

شیر نے گرم مزاجی میں پانی میں اپنا عکس دیکھا

شیر کی شکل اور اُس کی بغل میں موٹا خرگوش

جب اس نے پانی میں اپنے دشمن کو دیکھا

اس کو چھوڑ دیا، اور کنویں میں دوڑ گیا

اُس کنویں میں جا گرا جو اُس نے کھودا تھا

کیونکہ ظلم اُس کے سر پڑ نیوالا تھا

ظالموں کا ظلم اندھیرا کنواں تھا

تمام عالِموں نے یہی کہا ہے

جو زیادہ ظالم ہے، اُسکا کنواں زیادہ خوفناک ہے

اِنصاف نے فرمایا ہے بدتر کو بدتر

اے وہ کہ تو ظلم کر کے کنواں کھودتا ہے

خود اپنے لئے جال تنتا ہے

ریشم کے کیڑے کی طرح اپنے چاروں طرف نہ تن

تو اپنے لئے کنواں کھود رہا ہے، اندازے سے کھود

تو کمزوروں کو بے حمایتی نہ سمجھ

قرآن سے اِذاجاءَ نَصرُاللہِ کو پڑھ

اگر تو ہاتھی ہے، تیرا مدّ مقابل تجھ سے بھاگ گیا

دیکھ! طیراً ابابیل کی سزا تیرے پاس پہنچ گئی ہے

اگر کوئی کمزور زمین میں اَمان کا خواہاں ہوتا ہے

آسمان کے سپاہیوں میں شور مچ جاتا ہے

اگر تو اُسے دانتوں سے کاٹ کر لہو لہان کر دیگا

تجھے دانتوں کا درد آ پکڑ یگا تو تو کیا کریگا

شیر نے اپنے آپ کو کنویں میں دیکھا اور غلو کی وجہ سے

اپنی ذات اور دشمن میں اس وقت امتیاز نہ کر سکا

اُس نے اپنے عکس کو اپنا دشمن سمجھا

لا محالہ اپنے اوپر تلوار سونت لی

اے ظالم! ظلم( کی صفت) جو تو لوگوں میں دیکھتا ہے

اے فلاں! وہ اکثر تیری ہی خصلت ان میں ہوتی ہے

ان میں تیری ہستی نمایاں ہو رہی ہے

تیرے نفاق اور تیرے ظلم اور تیری بدمستی سے

وہ تو ہی ہے اور وہ زخم تو اپنے آپ پر لگا رہا ہے

اور تو اُس وقت اپنے اوپر لعنت کے تار تن رہا ہے

تو اِس بدی کو اپنے اندر نمایاں نہیں پاتا ہے

ورنہ تو خود اپنی جان کا دشمن بنا ہوا ہے

اے بیوقوف! تو اپنے اوپر حملہ کرتا ہے

اُس شیر کی طرح جس نے اپنے اوپر حملہ کیا

جب تو اپنی عادت کی گہرائی پر پہونچیگا

پھر تو جانے گا کہ وہ نالائقی تیری ہی تھی

شیر کو گہرائی میں جا کر معلوم ہوا کہ

وہ اُس کا اپنا ہی عکس تھا جو دوسرے کا نظر آرہا تھا

جو کسی کمزور پر ظلم کرتا ہے

وہ اس غلط بیں شیر کا کام کرتا ہے

اے چچا کے چہرے پر بد نما تِل دیکھنے والے!

وہ تیرے تِل کا عکس ہے، چچا سے نفرت نہ کر

مومن، ایک دوسرے کا آئینہ ہے

یہ حدیث رسول اللہ (صلی اللہ علیہ وسلم) سے بیان کی ہے

تو نے اپنی آنکھوں پر اندھا چشمہ لگایا ہے

اِس وجہ سے تجھے دنیا تاریک نظر آرہی ہے

اگر تو اندھا نہیں ہے، تو یہ تاریکی اپنی طرف سے سمجھ

اپنے آپ کو بُرا کہہ، آئندہ کسی کو بُرا نہ کہہ

اگر مومن’’ینظر بنور اللہ‘‘ نہیں تھا

تو اُس نے مومن کا عیب صاف کیسے بتا دیا

چونکہ تو یَنُظُرُ بِنارِ اللہ تھا

(ٓاِس لئے) نیکی کو بدی سے پہچان سکا

آگ پر تھوڑا تھوڑا پانی چھڑک

اے غمگین! تاکہ تیری آگ نور بن جائے

اے ہمارے رب تو پاک پانی چھڑک

تاکہ یہ دنیا کی آگ سب نور بن جائے

پہاڑ اور دریا سب تیرے حکم کے ماتحت ہیں

اے خدا! پانی اور آگ تیری ملکیت ہے

اگر تو چاہے، آگ عمدہ پانی بن جائے

اگر نہ چاہے تو پانی بھی آگ بن جائے

بغیر مانگے تو نے ہمیں مرادیں دی ہیں

اَن گنت اور بے شمار تونے اِنعام فرمائے ہیں

یہ ہمارا مانگنا بھی تیری ہی ایجاد ہے

اے خدا! ظلم سے نجات پانا، تیری عطا ہے