اضافت کردن آدم آں زلت را بخویشتن کہ ربّنا ظلمنا و اضافت کردن ابلیس گناہ خود را بخدا کہ بما اغويتنی

حضرتِ آدم علیہ السلام کا اپنی لغزش کو اپنی طرف منسوب کرنا کہ اے ہمارے رب ہم نے ظلم کیا

اور شیطان کا اللہ تعالےٰ کی طرف منسوب کرنا کہ اے میرے رب مجھے تونے کیوں گمراہ کیا

اللہ کے فعل اور ہمارے فعل، دونوں کو دیکھ

ہمارے فعل کو تو موجود سمجھ، یہ ظاہر ہے

اگر مخلوق کا فعل موجود نہ ہو

تو کسی کو نہ کہہ کہ تونے ایسا کیوں کیا؟

اللہ کی آفرینش ہمارے اَفعال کی مُوجد ہے

ہمارے فعل، اللہ کی آفرینش کے نتیجے ہیں

اسلئے کہ بولنے والا یا حرفوں کو دیکھتا ہے یا مطلب کو

ایکدم دو حالتوں پر کیسے حاوی ہو سکتا ہے؟

اگر معنیٰ کی طرف گیا، حروف سے غافل ہوا

کوئی آنکھ ایکدم آگے اور پیچھے نہیں دیکھ سکتی

جس وقت تو آگے دیکھتا ہے، اُس وقت

تو اپنے پیچھے کب دیکھ سکتا ہے، یہ سمجھ لے

جب ایک جان حروف اور معنیٰ پر حاوی نہیں ہوسکتی ہے

تو جان دونوں کی خالق کیسے ہو سکتی ہے؟

اے بیٹا! اللہ سب پر حاوی ہے

اُسکو ایک کام دوسرے کام سے نہیں روکتا ہے

شیطان نے کہا کہ مجھے کیوں گمراہ کیا؟

کمینے شیطان نے اپنے فعل کو چھپانا

آدم (علیہ السّلام) نے کہا ہم نے اپنے اوپر ظلم کیا

وہ اپنے فعل سے ہماری طرح غافل نہ تھے

انہوں نے گناہ (کے معاملہ) پر ادب کی وجہ سے اس (اللہ کے فعل) کو چھپا لیا

اپنے اوپر گناہ لے لینے سے اُنہوں نے پھل کھایا

توبہ کے بعد اُن سے کہا اے آدم! کیا میں نے نہیں

پیدا کیا تھا تجھ میں وہ جرم اور مصیبتیں

کیا وہ میری تقدیر اور قضا نہ تھی؟

تونے عذر کے وقت اس کو کیوں چھپایا؟

حضرتِ آٓدمؑ نے کہا میں ڈرا، ادب کو نہ چھوڑا

(اللہ تعالےٰ) نے فرمایا میں نے بھی تیرے لئے اُس کا لحاظ رکھا

جو شخص تعظیم کرتا ہے عزّت پاتا ہے

جو شخص شُکر لاتا ہے وہ بادامی حلوہ کھاتا ہے

پاک چیزیں کس کے لئے ہیں، پاک لوگوں کے لئے

دوست کو خوش رکھ، رنجیدہ نہ کر اور دیکھ

اے دل! ایک مال فرق کرنے کے لئے لا

تاکہ تو جبر کو اختیار سے جدا سمجھ سکے

وہ ہاتھ جو رعشہ سے ہل رہا ہے

اور وہ ہاتھ جسکو تو جگہ سے ہلا رہا ہے

دونوں حرکتوں کو اللہ کی پیدا کردہ سمجھ

لیکن اِسکو اُس پر قیاس نہیں کیا جاسکتا ہے

اُس سے تو شرمندہ ہے جس کو تونے ہلایا ہے

رعشہ والا انسان کیوں شرمندہ نہیں ہے؟

یہ عقلی بحث ہے، عقل کیا ہے، حیلہ گر ہے

شاید کوئی کمزور (اُسکے ذریعہ) اُس مقام تک پہونچ جائے

عقلی بحث، خواہ موتی اور مونگا ہو

روحانی بحث دوسری ہی چیز ہے

روحانی بحث کا مقام دوسرا ہے

روحانی شراب کا قوام ہی دوسرا ہے

جس زمانہ میں عقلی بحث مہیا تھی

یہ (حضرت) عمرؓ ابو جہل کے ساتھ ہمراز تھے

عمرؓ جب عقل سے روح کی طرف آئے

اُنکی بحث میں بوا لحکم ابوجہل بن گیا

عقل اور حواس کے اعتبار سے وہ پورا ہے

اگرچہ روح کے اعتبار سے وہ جاہل ہے

عقلی اور حسّی بحث کو اثر یا سبب سمجھ

روحانی بحث یا عجیب ہے یا اُس سے بھی بڑھکر ہے

اےروشنی کے طالب! روح کا نور جب آیا

لازم اور ملزوم اور نافی مقتضی نہ رہے