عشاق جو ہیں احمدِ مختار تمہارے

عشاق جو ہیں احمدِ مختار تمہارے

بیزار ہیں جینے سے دیدار تمہارے

رہ کر یہی کہتے ہیں طلبگار تمہارے

ہم گرچہ نہیں قابل دربار تمہارے

کہلاتے تو ہیں بندۂ سرکار تمہارے

اپنے ہم نفسو کوئی اگر جائے اُدھر کو

کہنا شہ دیں سے خبر خستہ جگر کو

دیدار کی دولت تو ملی اہلِ نظر کو

اچھے رہے نزدیک برے جائیں کدھر کو

گل ہیں تو تمہارے ہیں جو ہیں خار تمہارے

تھا گرچہ منور مہِ کنعان کا ستارا

نور آپ کا جب دیدۂ یعقوب سے گذرا

وہ کہنے لگے دیکھ کے یہ صورتِ زیبا

یوسف پہ تو عاشق تھی فقط ایک زلیخا

یوسف سے ہزاروں ہیں خریدار تمہارے

پیشانی پہ ابروئے محمد کی ہے تحریر

یا معرکۂ بدر میں صمصام کی تنویر

کہتے تھے شجاعانِ عرب دیکھ وہ تصویر

مقتل میں جو آؤ تو نہ لو ہاتھ میں شمشیر

بس کرتے ہیں دوا بروئے خمدار تمہارے

قم کہنے کی تکلیف اٹھاتے تھے مسیحا

تب پیروں میں کر پاتے تھے اک مردہ کو زندہ

تم چشم زدن میں یہ دکھاتے ہو تماشا

مردہ کو تو زندہ کرو اور زندہ کو مردہ

دو وصف ہیں ان آنکھوں سے اظہار تمہارے

گو سب سے نرالی ہے ہر اک آن تمہاری

پھر آنکھوں میں خالق نے بھری کوٹ کی شوخی

ہر اک کو یہی کہتے سنا جس پہ نظر کی

اک میں ہی نہیں تیرِ نگہ کا تری زخمی

بہتیرے ہیں ان آنکھوں کے بیمار تمہارے

اب بہرِ خدا چھوڑ دے اے پیرِ فلک جور

ممتازؔ کو پہنچا دے مدینہ میں تو فی الفور

جز اس کے یہ حضرت سے کروں عرض میں کچھ اور

خاموش نہیں قابلِ محفل جو کسی طور

کوچہ میں وہ بیٹھے پس دیوار تمہارے