عالم چہ شود ہمسر و ہمتائے محمد

دنیا محمد کی برابری اور ہمسری کیسے کر سکتی ہے؟ آپ تو سر سے پیر تک نور ہی نور ہیں۔

میرے سر میں سوائے ان کے خیال اور ان کے سودا کے کچھ نہیں، ہم ہیں ہمارا دل ہے اور آپ کی تمنا ہے۔

آپ کے زلف کی (سیاہی) برابری رات (کی سیاہی) نہیں کرسکتی، کیوں کہ شب قدر تو آپ کے شب معراج کی معمولی عکس کی حیثیت رکھتی ہے۔

مجھ پریشان حال کا منہ ہو اور ان کے در کی خاک، حیران آنکھیں ہوں اور آنحضرت کا تماشائے جمال۔

اے فردؔ! بارگاہ نبوی کا کتا ہونا، جمشید (ایران کا مشہور بادشاہ) کی حکمرانی اور حضرت سلیمان کے تخت ملنے سے بہتر ہے (مطلب یہ ہے کہ آپ کی غلامی اور دنیا کے نامور حکمرانوں کی سلطنت ہمارے سامنے ہو تو آپ کی غلامی ہمارے لئے لائق ترجیح ہوگی، یہاں حضرت سلیمان کے منصب نبوت سے قطع نظر صرف ان کی بادشاہت کا ذکر بطور مثال کیا گیا ہے)۔