نہ دنیا را طلبگارم نہ عقبیٰ را پرستارم

نہ میں دنیا کا طلبگار ہوں، نہ عقبیٰ کا پرستار ہوں لیکن قلندر کی طرح وارستہ اور بے نیاز دل رکھتا ہوں۔

زاہد کو حج کی راہ مبارک ہو، میں قلندر مشرب ہوں میں نے دوست کی راہ میں خود کو گم کردیا ہے (زاہد رسمی حج کی ادائیگی کے لیے نکلا ہے اور میں دوست حقیقی اللہ تعالیٰ کی راہ میں گم ہوں کیوں کہ یہی رہ قلندر ہے اور حج کی راہ بھی رہ قلندری ہو سکتی ہے اگر عشق حقیقی ہو)۔

میں نے پیر مغاں کے آستانے کے پتھر سے تقویٰ کا شیشہ توڑ دیا، (اب حال یہ ہے کہ) ہاتھ میں جام شراب ہے پیر میں لغزش ہے اور مست و سرشار ہوں (شیشہ تقویٰ سے وہ رسوم ظاہری و شرعی مراد ہیں جو کیفیات روحانی سے خالی ہیں)۔

کیا پوچھتے ہو مجھ سے اے فرد! اس کے عشق کا انجام؟ ابھی تو میں اپنے خواجہ کی بارگاہ میں خود نو گرفتار ہوں (خواجہ سے، خواجۂ عالم بھی مراد ہو سکتے ہیں اور خواجہ عماد الدین قلندر بھی جن کے سلسلہ سے حضرت فردؔ وابستہ تھے)۔