لی حبیبٌ عربیٌ ٌمدنی ٌقرشی

میرا ایک محبوب ہے جو عربی ہے، مدنی ہے، قریشی ہے، اس کے عشق کا دردوغم میرے لئے خوشی اور شادمانی ہے۔

اس کا راز تم سمجھ نہیں سکتے، وہ عربی ہیں ارو میں عجمی ہوں، ان کے عشق میں لاف زنی کیا کروں۔ وہ قریشی ہیں، میں حبشی ہوں ( یعنی ان کے اعلیٰ نسبی اور ان کے حسن تاباں کے سامنے میں بہت کمتر اور سیاہ رو ہوں)۔

اگر چہ میرے سامنے (وہ محبوب) سینکڑوں مرحلہ دور ہیں (لیکن نگاہ تصور اور قربت دلی کی بنا پر) ان کا رخ روشن صبح وشام میری نظر کے سامنے ہے۔

ان کے شراب عشق کی تعریف مجھ مست سے نہ پوچھو بخدا اس شراب (عشق رسول) کی لذت جب تک چھکو گے نہیں، جان نہیں سکتے۔

اس آب حیات (شرابِ عشق نبی) سے سیر ہوجانا، میرے حق میں بہتر نہیں ہے۔ اللہ میری اس پیاس کو بڑھاتا رہے (یعنی محبت نبوی ہمیشہ باقی رہے، اس محبت میں تڑپتے رہنا ہی ایمان کا کمال ہے)۔

جامی! جان لو اہل وفا ان کے عشق کے راستے پر ہی ہمیشہ چلتے رہتے ہیں۔ تمہارا سر بھی باقی نہ رہے اگر تم نے اس راہ سے قدم کھینچ لیا (یعنی اس راہ عشق اور راہ وفا کو چھوڑ دینے کے بعد تم زندہ نہیں رہ سکتے۔ ان کا عشق ہی عاشقین صادقین کی زندگی ہے)۔