سراپا رحمت شفیع_محشر حجازی_دولہا سلام تم پر

سراپا رحمت شفیع محشر حجازی دولہا سلام تم پر

کلید جنت قسیم کوثر حجازی دولہا سلام تم پر

فلک پہ قدسی زمیں پر انساں صدف کے موتی چمن کے غنچے

ادب سے کہتے ہیں سر جھکا کر حجازی دولہا سلام تم پر

شجر تصدق حجر تصدق ہر ایک لعل و گوہر تصدق

نثار دونوں جہان تم پر حجازی دولہا سلام تم پر

گلوں کے حیرت نما نظارے یہ آبشار اور حسین دھارے

فدا ہیں سب نجم و ماہ و نیر حجازی دولہا سلام تم پر

یہ زلف مشکیں یہ روئے تاباں گلابی لب اور چہ زنخداں

ہے شب تصدق سحر نچھاور حجازی دولہا سلام تم پر

خدائی کیا ہے خدا تمہارا مگر غذا نان جو کا پارا

وہ خشت تکیہ چٹائی بستر حجازی دولہا سلام تم پر

قمر اشارہ سے ہو دو پارہ ید کرم سے رواں ہو چشمہ

سنائیں کلمہ ادب سے پتھر حجازی دولہا سلام تم پر

وہ دشمنوں کو پیام الفت زبان شیریں سے درس وحدت

وہ سنگ باری سے زخم سر پر حجازی دولہا سلام تم پر

مزاج ناساز غیر حالت وہ شب کو اٹھنا پئے عبادت

وہ کالی کملی میں جسم اطہر حجازی دولہا سلام تم پر

نہ بھولے تم جس کو وقت رحلت وہ ناز پر تمہاری امت

یہ کہہ رہی ہے مرے پیمبر حجازی دولہا سلام تم پر

بلا لو واصفؔ کو در پر اپنے بنا لو مفتوں دکھا دو جلوہ

بہت ہے اب بے قرار و مضطر حجازی دولہا سلام تم پر