محمد کا کرم اللہ کی رحمت بن گیا سہرا

محمد کا کرم اللہ کی رحمت بن گیا سہرا

بزرگوں کی دعا سے وجہ راحت بن گیا سہرا

بحمد اللہ سر نوشاہ کی زینت بن گیا سہرا

خدا کے فضل سے پیغام سنت بن گیا سہرا

کہ دولہا اور دلہن کی محبت بن گیا سہرا

بہار شادمانی آئی ہے اللہ کی رحمت سے

کھلی ہیں آج ارماں کی کلیاں اس کی قدرت سے

یہ جلسہ بزم عشرت بن گیا شادی کی برکت سے

سر محفل عزیزوں نے جو دیکھا چشم الفت سے

تو بھائی کی خوشی بہنوں کی چاہت بن گیا سہرا

سنو اے دوستوں اک مدھ بھری جھنکار ہے شادی

مبارک ہو نشاط و عیش کا شہکار ہے شادی

محبت کا یقیں ہے پیار کا اظہار ہے شادی

جو والد کی خوشی تو والدہ کا پیار ہے شادی

سر محفل عزیزوں کی مسرت بن گیا سہرا

سجا دولہا تو پیار آنے لگا پھولوں کے گجرے کو

بہاریں دیکھتی ہی رہ گئیں نوشہ کے چہرے کو

حسیں لڑیوں سے چوما جھوم کر ایک جلوے کو

سجایا ہم نے یوں الفاظ کے پھولوں سے سہرے کو

دلہن کی طرح انورؔ خوب صورت بن گیا سہرا