جدائی پر اشعار

پتے ٹوٹ گئے ڈالی سے یہ کیسی رت آئی

مالا کے منکے بکھرے ہیں دے گئے یار جدائی

جدائی میں یہ دھڑکا تھا کہ آنچ ان پر نہ آ جائے

بجھائی آنسوؤں سے ہم نے آہ آتشیں برسوں

خوب سی تنبیہ کرنا اے جدائی تو مجھے

گر کسی سے پھر کبھی قصد آشنائی کا کروں

آشوب جدائی کیا کہئے انہونی باتیں ہوتی ہیں

آنکھوں میں اندھیرا چھاتا ہے جب اجیالی راتیں ہوتی ہیں

جدائی میں نہ آنا تھا نہ آئی

مجھے ظالم قضا نے مار ڈالا

محبت میں جدائی کا مزا مضطرؔ نہ جانے دوں

وہ بلبل ہوں کہ گل پاؤں تو پتا درمیاں رکھوں

آہ ملتے ہی پھر جدائی کی

واہ کیا خوب آشنائی کی

برق کا اکثر یہ کہنا یاد آتا ہے مجھے

تنکے چنوانے لگی ہم سے جدائی آپ کی

ادھر تو آنکھوں میں آنسو ادھر خیال میں وہ

بڑے مزے سے کٹی زندگی جدائی میں

پھر درد جدائی کا جھگڑا نہ رہے کوئی

ہم نام ترا لے کر مر جائیں تو اچھا ہو

ذبح کرتی ہے جدائی مجھ کو اس کی صبح وصل

خواب سے چونک اے موذن وقت ہے تکبیر کا

رہے تیری قدرت کا جب تک عمل

یہی اس کی فرماں روائی رہے

گر ملوں تو تند خو ہو گالیاں دیتے ہو تم

دور رہنے سے ستاتی ہے جدائی آپ کی

اللہ رے تاریکی خورشید جدائی

ہے صبح میں اپنی شب دیجور کی صورت

مزہ میں دم بھرا وارث کی سچی آشنائی کا

یہ کیا معلوم تھا ہم کو کہ غم ہوگا جدائی کا

اگر ایک پل ہو جدائی تیری

تو صحرا مجھے سارا گھر بار ہو

ستم کرتے مل کر تو پھر لطف تھا

جدائی میں کیا آزمایا مجھے

جدائی میں لب خشک ہیں چشم تر ہیں

ادھر بھی شۂ بحر و بر دیکھ لینا

وصل عین دوری ہے بے خودی ضروری ہے

کچھ بھی کہہ نہیں سکتا ماجرا جدائی کا